tupannartoq
Qimmit tallimat ukkatarinerlunneqartut toqunneqartut
Nunaqarfimmi Ikamiuni kommunefogdep qimmit ukkatarinerlunneqartut tallimat toquttariaqarsimavai. Ilulissani qimmit sisamat aamma toqunneqartariaqarsimavoq
Ilulissani uumasut nakorsaata Sanne Eline Wennerbergip Ilulissani politiit Qaasuitsup Kommunialu suleqatigalugit, Ilulissani qimmit 19-it paarinerlunneqartut toquttariaqarsimallugit juulip 23-ani nalunaaruteqarpoq.
Ajoraluartumik assingusumik pisoqaqqippoq.
Nunaqarfimmi Ikamiuni qimmit tallimat uumasut nakorsaannit toqunneqartariaqarsimapput.
Uumasut nakorsaat Ilulissani qimmilerisoq ilagalugu qimmit ataatsimut pigineqartut sisamat marlunngornermi oktobarip arfineq pingajuanni takusarsimavaat. Uumasut nakorsaat oqaluttuarpoq qimmit sisamaat toqoreersimasoq siumorsimallugu.
Qimmeq toqungasoq qimmiaqqanik arfinilinnik ilumittoq, sapaatip akunnera qaangiutsinnagu sarlialereersimassagaluarpoq.
- Qimmeq naartunermi nalaani naammattunik nerisinneqarneq ajorami toqusimavoq. Ammarterlugu misissorakku takusinnaavara tingui perlilertarsimanerminit sussaajunnaarsimapput, taakkuuppullu toqutigisai, Sanne Eline Wennerberg oqarpoq.
Qimmiutilik periarfissinneqarpoq qimmini nerisinnaassagai. Qimmimik naartusumik perlilertitsisimanini pissutigalugu politiinut suliassanngortinneqassaaq.
- Qimmini naalliutsitarisimavaa, uumasut nakorsaat oqarpoq, erseqqissaallunilu kommunimik politiinillu suliassanik taamaattunik suleqatigiilluarsimallutik.
- Qujanartumik piffissaagallartillugu kommunimeersumit takkuttoqarpoq, takkutiaanngitsuuppat qimmit toqunneqartariaqarsimallutik, qimmilli saloqaat, tusagassiutinut nalunaarummi Sanne Eline Wennerberg oqarpoq.