Uumasut
Qimmit qitsuillu akiuussuserneqassapput
Namminersorlutik Oqartussat kommunillu qimmit qitsuillu akiissuserneqarnissaannik isumaqatigiissuteqarput
Qimmit qitsuillu akiuussuserneqartarnissaat kommuninit akisussaaffigineqalissaaq. Isumaqatigiissummi kingullermi kikkut akisussaasuunersut takujuminaatsuuvoq. Qimminut qimuttunut akiuussutissat savaatillullu qimmiinut akiuussutissaat suli akeqartinneqassanngillat.
Isumaqatigiittoqarpoq Namminersorlutik Oqartussat perlerortoqarnerani akiuussutissat pisiarisassagaat kommuninullu nassiussortassallugit, Nammisersorlutik Oqartussat Kanukoka-lu nalunaaruteqarput.
Kommunalbestyrelsip akisussaaffigissavaa akiuussutissat eqqortut atorneqarnissaat. Akiuussutissiisimanerit Namminersorlutik Oqartussanut kvartalikkaarlugu nalunaarsuisoqartassaaq.
Akiuussutissamik kapisiup nalunaarsortassavaa uumasut qassit perlerornermik akiuussutissalerneqarsimanersut, tassani uumasut qungasequtaanni nalunaarsuummik ikkussisoqartassaaq. Uumasut piginnittuisa akisussaaffigissavaat uumasuutiminni qungasequtaanni perlerornermik akiuussutissaanik kapineqarsimanerata uppernarsaataa atassasoq.
Qimmit qimuttut savaatillillu qimmiisa akiuussutissalerneqarnerannut akiuussutit, uppernarsaatit, kapuutillu landskarsip akilertassavaat.
Qimmit qimuttuunngitsut savaatillillu qimmiunngitsut sinneri uumasuutigineqartut akiuussutissalerneqartarnerat piginnittunit akilerneqartassapput. Tassani qitsuit aamma ilaapput. Uumasuutigineqartut akiuussutissinneqarsimanngippata piginnuttuusut akisussaanerat pillugu akiligassinneqarsinnaapput. Akiligassiinermi akiuussutissanut akiligassat kisimik akilerneqassapput.
Inatsisini ilaavoq qimmit qitsuillu perlerornermut akiuussutissalerneqartalernissaat. Akiuussutissinneqartassapput uumasoq sisamanik arfinilinnillu akornanni qaammateqaraangat. Taanna pereerpat ukiut pingasukkaarlugit akiuussutissaanik kapineqartassaaq.