Qimmit qimuttut pigiinnarniarlugit ilungersorput

Naalakkersuisut siulittaasuat Aleqa Hammond Siumumeersoq aamma Partii Inuit sinnerlugit Inatsisartuni ilaasortaq Randi Broberg qimussiunneqarput qimmit pillugit isumasioqatigiinnissaq sioqqutilaarlugu. Qimmit neqaannik tunisassiorsinnaaneq oqallissigineqartussat ilagaat isumasioqatigiinnermi malunngornermi Ilulissani Hotel Arcticimi aallartittumi.

Qimmit qimuttut Nunatsinni ikiliartupiloorput. Naalakkersuisut paaserusuppaat sooq qimmit taama ikiliartortiginersut.

- Imaassinnaavoq silaap allanngornera pissutaasoq aamma imaassinnaavoq inuussutissarsiornermi qimussit atorunnaariartorneeqartut, Naalakkersuisut siulittaasuat Aleqa Hammond Avannaata Qimussersuanut illersuisuusoq oqarpoq.

Kulturikkut kingornussaq
Taamaammat qimmit pillugit isumasioqatigiinnermi Kalaallit Nunaanni Qimussertartut Kattuffiata KNQK aaqqissugaani peqataavoq.

- Qimmeqarneq pisariusorujussuvoq. Qimmit pigiinnarnissaat akisusarpoq qimusserneq sivikilligaluttuinnartillugu. Taamaammat aaqqiissutissanik nassaarniaqatigiittariaqarpugut qimmiutillit pitsaanerpaamik ikiorserniarlugit, Aleqa Hammond oqarpoq.

Taassumattaaq ernumaammernartippaa qimmit qimuttut ikiligaluttuinnarnerat.

- Qimussertarneq kulturitsinnut kinaassutsitsinnullu pingaarutilerujussuuvoq. Taamaammat pingaaruteqarluinnarpoq tammatsaaliorneqarnissaa, Aleqa Hammond oqarpoq.

KNQK-mit periarfissat ilaattut tikkuarneqarpoq qimmit neqaannik tunisassiorsinnaaneq qimmeq qimuttoq pigiinnarumallugu.

- Qimussertartut piniartullu aamma facebookikkut allaffigqattaarpaannga oqallinnermut soqutiginnillutik malinnaagamik, Aleqa Hammond oqarpoq.

- Siunnersuutigineqartut ilagaat qimmit qimuttut allamiut qimmiisut immikkuullarissuummata naleqarluartutut pineqartariaqartut. Qimmermi allanit akusaanngitsoq pigaarput oqalliseqataasut ilaasa oqarnerattut nalilittut aamma pineqartariaqartoq, Aleqa Hammond oqarpoq.

Isumasioqatigiinneq sisamanngornermi naammassissaaq.