Qimmit qimuttut nappaalasut - oqartussat iliuuseqarput

Uumasunut inuussutissanullu nunatsinni oqartussaasut ilisimatinneqarsimapput Avanersuarmi, Siorapalummi, Qaanaap avannaaniittumi qimmit nappaalalersimasut.

Akiuiniarneq

Avannaata Kommuniani nappaalalersimaneq akiorniarlugu iliuuseqartoqalerpoq. Pineqartoq pillugu Avannaata Kommuniata Uumasunut Inuussutissanullu Oqartussaaffeqarfik attaveqarfigaa, borgmester Palle Jerimiassen tusagassiuutinut nalunaarummi paasissutissiivoq.

- Kommunip Avanersuarmi qimminut inatsit nutaaq piviusunngortinnissaa ajornartorsiutigisimavaa, tamatumalu nassatarisaanik inatsimmi piumasaqaataasoq akiliuussutissiinissaq piviusunngortikkuminaatsissimallugu, borgmesteri paasissutissiivoq.

Akiuussutissaq aggiunneqartoq

Qimmunut inatsimmi piumasaqaataasut piviusunngortinniarlugit kommuni ullumikkut suliniuteqarpoq. Pingasunngorpat januaarip qulingani 2018 qimminik isumaginnittussamik Ilulissaniit Avanersualiartitsisoqassaaq. Taassuma pikkorissarsimanissamut piumasaqaataasut naamaasinikuuai, taamaalillunilu qimminik akiuussutissaliisinnaalluni. Taassuma saniatigut qimmit nappaataasa qanoq siaruartigisimanera nalunaarsussuaa. Akiuussutissanik ilisimasanillu nassarluni avannamukassooq, taamaalilluni nappaalanerup siaruatsaalinissaa ingerlanneqalissalluni.

Avannaata Kommuniata kommunemut tamarmut iliuusissamik pilersaarusiussaaq, taamaasilluni qimminut inatsit avannaata piviusunngortissinnaassallugu.

Qimminut nakkutiliisumik atorfinitsitsineq

- Pilersaarut tassaavoq qimminik nakkutilliisussamik ataqatigiissaarisussamik atorfinitsitsinissaq inatsimmi pioumasaqaataasut naammassineqarnissaasa tungaanut. Akisussaaffik annertuvoq, taamaattumillu iliuusissaq ataqatigiissaarneqarlunilu aaqqissuulluagaasariaqarpoq. Piviusunngortitsiniarneq iluatsissappat. Kommunalbestyrelse isumaqarpoq qimmit pigiinnarnissaat pingaartuusoq, Avannaata Kommunianut ilisarnaataalluinnarmat, Palle Jerimiassen oqarpoq.