qimmit qimuttut
Qimmit qimuttut mikrochipileraat
Qimmit qimuttut nungukkiartuinnannginnissaat qulakkeerniarlugu mikrochipimik timimikkut ikkussiffigineqassapput taannalu atorlugu piginnittut mobili emaililu atorlugit kalerrisaarneqarsinnaalissapput
Qimmeq qimuttoq pituussaarsimasoq qanittumi kimit pigineqarnersoq paasineqarpoq chipimik atuaassut angallattagaq atorlugu. AG aviisi allappoq.
Qimmit immikkut normullit
Chippia immikkut normoqarpoq tassanilu aamma qimmeq piginnittualu pillugit paasissutissat takuneqarsinnaapput. Qimmit qimuttut qimmillu illumiutat piffissami aggersumi tamarmik mikrochippimik ikkussiffigineqassapput paasissutissallu tamarmik databasemut katersorneqarlutik.
Database UumaReg pilersinneqareerpoq tassungalu katersorneqassapput qimmit qimuttut, qimmit ikiaroornartunik ujarlertartut, politiit qimmii qimmillu illumiutat pillugit paasissutissat. Tamatumunnga aallarniutaavoq qimmit pillugit inatsit nutaaq ukiortaami atulersoq. Inatsit malillugu qimmit tamarmik pinngitsooratik qimmit nappaataannut, parvovirusimut perlerornermullu akiuussutissamik kapitissimasussaapput.
- Aatsaat aallartisalerpugut. Suleriaatsimi nutaami Ilulissat misiliutaagallassapput, Qaasuitsup Kommuniani Ilulissani innuttaasunik sullissivimmi pisortaq Sussi Cortzen oqarpoq. Taanna paasissutissiivoq:
Kukkuneqarnersoq misilittarneqarniartoq
- Database atuligarput programmitigut iluarsisariaqassanersoq misilittaqqaarlugu qimmeqarfinni allani qimmit mikrochippilersorneqarumaarput. Aallaqqaaterpiaaniit aallartippugut qimmit inersimasut qimmiaqqallu qaammatit pingasut sinnerlugit utoqqaassusillit mikrochippilersussagatsigit. Pilersaarutaavoq qimmiaqqat pingasunik qaammateqalernerminni siullerpaamik parvovirusimut akiuussusertikkaangamik mikrochippilerneqartassasut, Sussi Cortzen oqarpoq.
Allaaserisaq tamakkerlugu AG aviisimi atuaruk, aviisi digitaliusoq uani pisiarisinnaavat: