assit takukkit
Qimmit qimuttut festivalimut nittarsaassisut
Sisimiuni Arctic Sounds festival ullumikkut aallartippoq, aaqqissuisullu nutaamik nittarsaassipput
Arctic Sounds Festivali nipilersorluni festivalinit allaaneruvoq, taamaattumillu aamma soorunami allatut ittumik tassunga nittarsaassisoqassaaq.
Taamaammat aaqqissueqataasup Pipaluk Lykke Løgstrupip qimmini qimuttut tujuuluaralerlugit seqinnarissuarmi Arctic Circle Racep campianukaappai.
- Qimmikka atisalersorlugit misilinnikuunngisaannarpara, maanna misilissavara, Pipaluk Lykke Løgstrup nassuiaavoq.
Qimmit qiimasut
Kisianni qimmit upernaakkut qiimmassimaartut campeqarfimma qiimaffiusumi eqqissisimatinnissaat ajornarput. Tujuuluaqqat ilaat qimmit kukiminnit putoorpaat.
- Tamarmik sssilitinnissaannut uninngatissinnaanngilakka. Soorunami aamma paaleraluarput. Kisianni nuannersorujussuuvoq.
Tujuuluaqqat festivalip ilisarnaataanik qalivaatillu qalattumut errorneqarsimasut, qimussiussisoq ullumi oqarpoq.
Festivali allaanerusoq
- Kisianni suli qimmersunnipput, tassami quuginnaagamik, isumassarsisoq illarpoq.
Sisimiuni Arctic Sounds Festivali ullumikkut ukiumoortoq aallartippoq, taaneqareersutullu festivalinit allanit allaaneruvoq.
Arctic Soundsimi festivalit allat killormoortuanik, nipilersortut tusarnaariartutulli nuannersumik misigisaqarnissaannut tunngasuuvoq.
Workshoppit aallartittut
- Nunani Avannarlerneersunut tamanut kulturikkut naapinneruvoq - nipilersornermik nuannarisalinnuinnaanngitsoq aamma nipilersortut akornanni - Canadamiit Letlandimut, Jacob Froberg oqarpoq, taanna illoqarfimmi nipilersornermik ilinniarfimmi aqutsisuuvoq Arctic Soundsimullu aaqqissuisuulluni.
Sapaatip-akunnerani kingullermi 'sannavik' ('songwriters retreat', aaqq.) aallartippoq, nipilersortartut immikkut ataatsimullu erinarsuutinik allallutik.
Aammattaaq ullormut workshoppit aallartipput, nipilersortartunut teknikkini aamma atortuni nutaanik ilinniartitsinertaqarluni.
Nipilersortorpassuit
Festivali ukioq manna pingajussaanik ingerlanneqalerpoq, nipilersortartunit 40-nit 70-nut ukioq manna annertuserujussuarpoq.
Maanna Arctic Soundsimut nipilersortartut Sverigemit, Norgemit, Savalimmiunit, Tysklandimit, Danmarkimit, Nunavumit, Polenimit, Letlandimit aammalu soorunami Nunatsinnit peqataasoqassaaq.