qimmit qimuttut

Qimmit neqaat pisiassaalissanngikkallarput

Qimmit qimuttut neqaasa Nunatsinni tuniniagassatut suliarineqartalernissaat aporfissaqarpoq

Uku qimmiaqqat anersaarulussinnaanngorunarput. Tassami neqitut tunisassiarineqaraatik qimuttuussapput

Qimmit neqaasa Nunatsinni pisiniarfinni pisiassaalernissaat qanittumi pinavianngilaq.

Qimmit nappaataat inuussutissalerinermilu malittarisassat pissutigalugit qimmit neqaat siunissami qaninnermi tunisassiarineqalernavianngillat.

Qimmit qimuttut pillugit isumasioqatigiinneq pingasunngornermi ingerlaqqimmat nersutit nakorsaat Sanne Wenneberg saqqummiussivoq qimmit neqaannik tunisassiortoqarnissaanut aporfiusinnaasunik.

Neqi ulorianarsinnaavoq

Qimmit qimuttut nappaatigisinnaasaat arlaqarput aamma inunnut ulorianarsinnaasut. Taakku ilagaat trikinit aamma perlerorneq peqqinnissamut ulorianaateqarsinnaasorujussuit

Qimmit neqaannik tunisassiorneq aamma aallartissinnaanngilaq inuussutissalerinermut nakkutilliineq savaaqqat neqaannik tunisassiornermi atuuttumut assersuunneqarsinnaasoq qulakkeerneqanngippat.

- Qimmit neqaat tonsilikkaat nunanut allanut tuniniarnissaat isumaanngikkaluarpoq. Anguniarneruarput qimmit neqaannik nerinermik sungiussereersimasut pisiarisinnaasaannik tunisassiornissaq. Maannali tassa paasivarput tamatuma aallarteriarnissaa aporfissaqartoq, Kalaallit Nunaanni Qimussertartut Kattuffianni KNQK-mi siulittaasoq Mikkel Jeremiassen Sermitsiaq.AG-mut oqarpoq.

Qimmit qimuttut ikiliartupiloorput. Taamaammat qimmit pillugit isumasioqatigiittoqarpoq sisamanngornermi naammassisussamik. Qimmit pigiinnarnissaat qulakkeerniarlugu isumassarsiat ilagigaluarpaat qimmit neqaannik tunisassiulersinnaaneq.

- Silaannaap allanngornera qimussernikinnerulernermik kinguneqartoq qanoq iliuuseqarfigisinnaanngilarput. Kisianni pissanganarpoq nammineq iliuuseqarfigisinnaasatta iluani periarfissat atorlugit qimmeq qanoq ililluta pigiinnarsinnaaneripput, Mikkel Jeremiassen oqarpoq.

Suleqatigiit eqikkaaneri inassutaallu isumasioqatigiinneq Ilulissani Hotel Arcticimi pisoq naggaserlugu saqqummiunneqassapput.

Powered by Labrador CMS