qimmit qimuttut
Qimmit naalliutsinneqartut 19-it toqunneqartut
Ilulissani uumasut nakorsaata oqaatigaa qimmit salungaarmata kaatsillugit pineqartarsimasutut oqaatigineqartariaqartoq
Ilulissani uumasut nakorsaata Sanne Eline Wennerbergip Ilulissani politiit Qaasuitsup Kommunialu suleqatigalugit, Ilulissani qimmit 19-it paarinerlunneqartut toquttariaqarsimavai.
Uumasut nakorsaat tusagassiutinut nalunaaruteqarpoq.
Qimmit aqqaneq marluk juulip 13-ianni toqunneqarput, arfineq marlullu juulip 22-anni toqunneqarlutik.
Sanne Eline Wennerberg oqaluttuarpoq qimmeqarfinni marluusuni qimminik toqungasoqareersoq.
Qimmit perlileqisut qilaleqisullu annerusumik naalliutsinnissaat piumanagu toqunneqarput.
Politiinut suliassanngortitsineq
Uumasut nakorsaat oqarpoq qimmit salungaarmata kaatsillugit pineqartarsimasutut oqaatigineqartariaqartoq.
- Qimmit salungaaramik orsoqanngilluinnarput, timaannilu, soorlu tinguini assigisaannilu aamma orsoqanngilluinnarlutik. Nukeerussimangaaramillu saanii erseqqarilluinnalersimallutik. Qimmit sivisuumik kaatinneqarsimasut takuneqarsinnaapput, kaallutillu ilaat toqusarsimallutik, umasut Nakorsaqarfik Inuussutissalerinermullu Oqartussaaffimmi uumasut nakorsaat Sanne Eline Wennerberg allappoq.
Qimminik kaatitsisut Ilulissani politiinut suliassanngortinneqarput.