qimmit qimuttut
Qimmit 19-it naalliutsinneqarsimaneri siulittaasumit tupaallaatigineqartoq
Qaasuitsup kommuniani takornariaqarnermut inuussutissarsiornermullu ataatsimiititaliami siulittaasoq Palle Jerimiassen, Ilulissani qimminik naalliutitsisimaneq tupaallaatigaa
Ilulissani qimminik naalliutsitsisoqarsimanera pissutaalluni qimmit 19-it toquinnarneqarput.
Qaasuitsup kommuniani kommunalbestyrelsimi ilaasortaq Palle Jerimiassen, Siumumeersoq, takornariaqarnermut inuussutissarsiornermullu ataatsimiititaliami siulittaasup nutaarsiassaq tupaallaatigaa.
- Qimminik naalliutsitsineq nunatta isigineqarneranik innarliivoq, Palle Jerimiassen Radioaviisimut oqarpoq.
- Takornariartitsisarnermut Nunatsinnilu ukiukkut inuussutissarsiornermut taama pisoqarnera iluatsitsinerliorneruvoq, KNR-imut oqarpoq.
Ilulissani uumasut nakorsaata Sanne Eline Wennerbergip Ilulissani politiit Qaasuitsup Kommunialu suleqatigalugit, Ilulissani qimmit 19-it paarinerlunneqartut toquttariaqarsimavai.
Qimmit aqqaneq marluk juulip 13-ianni toqunneqarput, arfineq marlullu juulip 22-anni toqunneqarlutik.
Sanne Eline Wennerberg oqaluttuarpoq qimmeqarfinni marluusuni qimminik toqungasoqareersoq.