Inatsisartut
Qimminut qimuttunut apeqquteqaat aallaavigalugu oqallisissiaq
Nunatsinni qimminik qimuttunik takornarialerinermut atorneqarsinnaasunik periarfissaqarluartoq, Inuit Ataqatigiinneersoq Villy Olsvig isumaqarpoq.
- Qanormita iliortoqarsinnaava qimmeqarnerup aammalu qimussertarnerup annertusaqqinneqarnissaanut.?
Inuit Ataqatigiit Inatsisartuni ilaasortaatitaat, Villy Olsvig, taama apeqquteqarpoq, taassuma Nunatsinni qimmit qimuttut ikiliartuinnarnerat ernumassutigaa.
Taassumalu apeqquteqaataa, ullumi marlunngornermeri Inatsisartut oqaluuserissavaat.
Ukiuni kingullernerni Sisimiuni qimmit qimuttut affaannangajanngorsimanerat, Villy Olsvigip assersuutigaa.
Qamutit motoorillit killilersorneqarnissaat
- Qanorliuna iliornikkut qimmit qimuttut qimussertarnerullu annertusarsinnaanera iliuseqarfigineqarniartoq? Isumaqarpunga politikkerit meeqqanut inuusuttunullu paasissutissiinerulerneq ilinniartitsinerlu ingerlattariaqaraat qimussip qimmeqartarnerullu inooriaatsitsinnut qanoq pingaaruteqartigineri pillugit, taanna ilaatigut taama allappoq.
Taassumma takornarissanik qimussiussisinnaanerup annertusarnissaa periarfissaqarluarnerarpaa, taamatuttaaq qimmit qimuttut avammut nittarsaannerusariaqartut.
- Aammalu Illoqarfinni nunaqarfinnilu qimmeqarfiusuni timaani qamutinik motorilinnik angalasinnaanerit killilersimaarneqarnerunissaat, sunniutilimmillu nakkutilliinerusinnaasumik pilersitsisoqarnissaa suliniutigalugu, taanna erseqqissaavoq.
- Tassami assortuinnarneqarsinnaagunanngikkaluarpoq qimmit qimuttut nunatsinni ikiliartorneri, silaannaammi kissakkiartornerata kingunerisaanik qimmeqaannarsinnaanissaq killilersimaarneqarpoq. Tamaattorli nunami maani ukiuunerani sila suli peqqarniittaqimmat unamminartunillu nutaanik nassataqarluni, politikkikkut aalajangertariaqalerpugut inatsisitigut sinaakkutissatsinnik tulluarsaalluta pisariaqarfiusunilu tapiissuteqartariaqarpugut siuariartoqqilissappat, Villy Olsvig oqarpoq.