Qimmiaqqat ujaqqanik toqunneqartarput

- Ukiut ingerlaneranni qimmiaraatikka arlaleriarlutik taamannak toqunneqartarput, piniartoq Ado Sandgreen Kangaatsiameersoq oqaluttuarpoq

– Qimusserneq nuannarilluarpara qimmikkalu paarilluarlugit. Paasisinnaangilara sooq qimmiaraatikka taamatut pineqartarnersut, piniartoq inuusuttoq Kangaatsiarmiu, Ado Sandgreen oqarpoq. Taanna sisamariarluni Avannaata Qimussersuanut peqataanikuuvoq. Assi.: Nammineq Pigisaq

Kangaatsiami ukioq 2007-imi qimmiaqqat suli anaanaminni miluttut, qimmillu inaani eqqissillutik alliartortut, inunnit kinaassusersineqarsimasunit ujaqqamik niaquisigut kaavarneqarlutik toqorarneqarput. Qimmiaqqat toqunneqareeramik aqqusiniinnarmut iginneqarput. Pisorlu avaanngunartoq taanna kingulliunngilaq.

Qimmiaqqanik piginnittoq tassaavoq piniartoq inuusuttoq 23-nik ukioqartoq, Ado Sandgreen, qimussillaqqissuunini qimminillu paarsilluartuunini pillugit ilisimaneqartoq. Taanna ilaatigut Avannaata Qimussersuanut sisamariarluni annguttarpoq, ukiorlu manna qimussimik sukkaniunnersuarmi unammisut siulliit arfineqaappaattut inissilluni.

Ado Sandgreenip ilisimavaa siullermik kikkut qimmiaqqanik toqutsisuunersut, pisorli pisortanut ingerlateqqissimanngilaa.

– Ukiut ingerlanerini qimmiaraatinnik ataasiarnani toqoraasoqartarpoq. Kingullermik taamatut pisoqarpoq siorna aasakkut. Qimmiaraatikka nerisaleqqammersut toqorarneqarsimapput, eqqaavissuarmilu qerititsivikup iluaniittut nassaaraavut.

Ukiukikkaluarluni sisamariarluni Avannaata Qimussersuanut annguttarsimanini qimminillu paarsilluartuunini pissutigalugu taamatut pineqartarnini pissutaaqataasinnaasoq, Ado Sandgreen isumaqarpoq.

– Paasisinnaanngilluinnarpara sooq qimmiaqqanut taamak avaangunartigisumik iliortoqartarnersoq. Qimmikka nuannaraakka paarilluarlugillu, taamaakkaluartoq illoqarfitsinni oqaasersisaqaanga qimmikka pillugit, inuillu ilaasa qimmikka amerlavallaarnerartarpaat, taamatullu pisoqartarnera assut ajuusaarnarpoq.

Ado Sandgreen maannakkut 22-nik qimmeqarpoq.

Qaasuitsup kommuniani susoqarnersoq sapaatip akunneranut saqqummertartumi Tamanut Avannaanimi oqaluttuap sinnera atuaruk. Aviisi akeqanngitsumik uani pisiariguk:

Powered by Labrador CMS