Qimarnguiviit pillugit ilisimasat amigartut

Nunatsinni qimarnguiviit qulingiluaapput, kisianni amerlasuut sumi inissisimanersut naluaraat, imaluunniit arnanut nakuuserfigineqartunut meeraannullu isumannaatsuunermik tapersersuisinnaasullu nalullugu. Maanna tamanna iliuuseqarfigineqassaaq

Angerlarsimaffimmi nakuuserneq annertusiartussappat, arnaq aamma meeqqat isumannaatsumut pisinnaanerat aalajangiisuusinnaavoq. Kisianni suleqatigiinnemi Kattunnermi, Nunatsinni aappariit nakuusertarnerannut iliuuseqarniarnermik nukittorsaanissamik suliaqartumi qimarnguiviit sumi inissisimanerinik, imaluunniit sunik neqerooruteqarsinnaanerinik ilisimannittoqannginnera malugineqarsimavoq.

Ulluni makkunani Kattunnerup qimarnguiviit tamaasa pulaaqattaarpaat, arnat meeqqallu nakuusernermit eqqugaasut pillugit sulinermi periutsit oqaloqatigiissutigiartorlugit. Kattunnermi pikkorissartitsinerup ilaatut pulaarnerit ingerlanneqarput, tassani oqaatsit atorlugit tarnilutsitsineq aamma aappariit nakuusernerisa kingunerisinnaasaipillugit sammineqarput, qimarnguinnilu sulisut tamarmik ukiaq Aasianni taanna peqataaffigaat.

Attaveqaatit pingaaruteqarput

Qimarnguinni sulisut pikkorissarnermi periutsit atorneqartut ulluinnarni qimarnguinni sulinerminni atortassagaat tunngaviusumik eqqarsaataavoq. Malitseqartitsilluni pulaarnerit qimarnguimmi kisimiilluni sulinermi kisimiinnginnerulersutut misigisimalertitsinermik kinguneqartut, Narsami qimarnguimmi pisortaq oqaluttuarpoq.

- Pikkorissartitsinerit kingorna tamatigut qaammatit maluk qaanngiukkaangata Kattunnermit pulaarneqartarpugut. Ilaqutariinnut nakuuserfiusunut suliaqartarninnut soqutiginninnermik allanik takutitsisoqaraangat, tamanna uannut nukissamik tunisisarpoq. Qimarnguinni suliagut kisermaattorujussuusarpagut, taamaattumillu siammasissumik tapersersoqatigisinnaasatsinnik attaveqaateqarnissarput pingaartueqarpoq, ilaqutariit pitsaanerpaamik ikiorsinnaaniassagatsigit, Narsami qimarnguimmi pisortaq, Magrethe Qujaukitsoq oqaluttuarpoq.

Qimarnguiviit pillugit ilisimasat amigartut

Illoqarfinni arlalinni qimarnguiviit Kattunnermit pulaartoqarneq, ilaqutariinnut nakuusernermut eqqugaasunut suliaqartunut attaveqaatinik ataatsimeeqateqarnermut atorneqartarpoq. Ataatsimiinnerit najukkami suleqatigiinneq nukittorsassaavaat, ilaqutariillu piffissami isumannaatsumik pisariaqartitsisut qimarnguivimmut saaffigiinnissinnaanerannik ilisimatitsinissaq qulakkeerlugu. Mælkebøttecenteretimi psykologi aamma pisortaq Kirsten Ørgaard oqarpoq. Mælkebøttecenteret Kattunnermi peqataavoq, Kirsten Ørgaardillu marsip ingerlanerani Aasianni, Qeqertarsuarmi aamma Ilulissani qimarnguiviit tikeraassavaia.

- Ukiut sisamat matuma siorna qimarnguivinni sulisut Kattunnermi ilinniarteqqittaleratsigit, qimarguiviit pillugit ilisimasat annikitsuararsuusut malugaarput. Arnaq meeraalu nakuusernermut eqqugaasut isumannaatsumut pinissaa, tamakkuninngalu sulianut ilisimasalinnik naapitaqarnissaat aalajangiisumik isumaqarsinnaasoq nalunngilarput. Taamaattumillu qimarnguiviit ilaatigut attaveqarfinnik ataatsimeeqateqarnissaannik ikiortarpagut. Illoqarfimmi pineqartumi suliamik ilisimasallit tamarmik qimarnguivinnik nalunngisaqarnissaat siunertaavoq, Kirsten Ørgaard oqarpoq.

Kattunneq Mary Fondenip, Dannerip, kalaallit qimarguiviisa, Mælkebøttecenteretip, Isumaginninnermut Naalakkersuisoqarfiup kiisalu Oak Foundation Denmarkip akornanni suleqatigiinneruvoq.

Powered by Labrador CMS