Qimagussortinneqartut uternissaa innersuutigineqanngilaq

Nuugaatsiami aamma Illorsuarni innuttaasut uternissaat ulorianarpallaartoq, upalungaarsimanermut ataatsimiititaliap nalilerpaa.

Naalakkersuisut siulittaasuat Kim Kielsen ullumi tusagassiortunik katersuutsitsinermi taama oqarpoq.

Siornatigut allaaserineqareersutut Nuugaatsiap eqqaani qaqqap ilaa imaanut nakkaariaannaavoq.

Tamanna tassaarsuaqartitseqqissinnaavoq, nunaqarfinnullu taakkununnga marlunnut innuttaasut Nuugaatsiamut aamma Illorsuarnut utertinnissaannut kalerrisaarinermi piffissaq sivikippallaarluni illersorneqarsinnaanngilaq.

Tamanna tunngavigalugu upalungaarsimanermut ataatsimiititaliap innuttaasut uteqqunngilaat.

Innersuussutigineqartorlu Naalakkersuisut isumaqatigaat.

Nuugaatsiamut tunngatillugu ima naliliisoqarpoq:

- Kalaallit Nunaanni Upalungaarsimanissamut Ataatsimiititaliap upalungaarsimanermik naliliinermini oqaatigaa, Nuugaatsiami maanna atugassarititaasut tunngavigalugit suli ulorianartorsiorfiusutut isigineqartariaqartoq. Tamatuma kingunerisaanik Kalaallit Nunaanni Upalungaarsimanermut Ataatsimiititaliaq naliliiivoq, maanna tunngaviusut tunngavigalugit innuttaasut Nuugaatsiamut utertariaqanngikkallartut.

Kalerrisaarummik pitsaasumik pilersitsigaluaraanniluunniit, uternissaq suli ulorianarpallaartoq ataatsimiititaliaq isumaqarpoq.

Nakkaasoqarneraninngaanniik kalerrisaarinermi Nuugaatsiamut apuunnissaanut 8-miit 9 minutsit tungaannaanut periarfissaqarnera tamatumunnga pissutaavoq. Tamatuma saniatigut mallit 5-miit 10 meterit tungaanut portussuseqarsinnaammata.

Illorsuarnut tunngatillugu ataatsimiititaliaq taamatut assingusumik oqaasertalimmik maanna utertoqannginnissaannut innersuussivoq.

Tassani mallit minutsit 12-t ingerlanerini apuutissapput. Maanna aamma Nunatsinnut tulluarsakkamik kalerrisaarutinik peqartoqanngilaq.

- Maannarpiaq alapernaarsuinermi kalerrisaarinermilu atortunik, Kalaallit Nunaanni pissutsinut naleqquttunik misilinneqarsimasunillu ilisimasaqartoqanngilaq, taama naliliisoqarpoq.

Arlaanni Illorsuarnut uternissaq periarfissanngussagaluarpat, taava atortut pingaarutillit portusuumik sanaartorneqartariaqassapput.

- Sumiiffinni tunngavissiaq 2-mi tassaarsuarmik nutaamik eqqorneqarsinnaasutut naliliiffigineqartumi najugaqarfinnik, atuarfinnik inuiaqatigiinnilu ulorianartorsiornermi atortunik peqassanngitsoq, Upalungaarsimanermut Ataatsimiitialiaq allappoq.

Innuttaasut nunaqarfinnit taakkunannga qimagussortinneqartut Aasianni Uummannamilu ullaap tungaani paasissutissiivigineqarlutik ataatsimiitinneqarput.