qimaasut

'Qimaasunik ikiuiniannginnatta inuunngilagut ajortut'

IA nuannarineqarniaannarlutik politikkikkut ingerlatsisutut Demokraatinit oqaatigineqarput. Landskarsimit aningaasanik sorsuffinnut ikiuiniartoqarsinnaanngitsoq Demokraatinit oqariartuutigineqarpoq

Randi Vestergaard Evaldsenip IA isornartorsiorpaa

Naalakkersuisooqatigiissimasut Inuit Ataqatigiit aamma Demokraatit isumaqatigiinngissuteqanngillat. Qimaasunik ikiuiniarnissamut tunngatillugu aamma isumaqatigiinngillat.

- IA isumaqarpoq qimaasunik tigusisariaqartugut. IA isumaqarpoq ikiuiniaqatigiinnut aningaasaliissasugut. IA-tut isumaqanngikkaanni, taava inuk ajortuussaagut. Taama inuttut misiginarpoq tamannalu iluanngilaq. Sualummik IA siunertai pitsaasorisat allaanngimmata massakkoqqissaaq pisut kisiisa tunngavigalugit tusaqqusaarnerusut taamalu innuttaasut partiillu immikkoortunut marlunnut tassa pitsaasunut ajortunullu avinniarsarlugit, Demokraatit politikkikkut oqaaseqartartuat Randi Vestergaard Evaldsen oqariartuuteqarpoq.

Nuannarineqarniarsarisut
Inuit Ataqatigiit innuttaasunik avissaartitsiniarsarisuunerarpai, tassa pitsaasunik ajortunillu.

- Aningaasanut inatsimmi takuneqarsinnaavoq pinngortitami ajunaarnersuaqartillugu Naalakkersuisut aalajangersinnaasut tapiissueqarnissamut. Tapiissutit annerpaamik ukiumut 500.000 koruuniusinnaapput. Tassa taama allassimasorpoq 2015-mut Aningaasanut Inatsimmi, qanorluunniillu isummersortigigaluaraanni Syriami eqqaanilu pinngortitami ajunaarnersuaqanngilaq. Pinngortitami ajunaarnersuartut taaneqartarput nunap sajunnera, ulussaarsuaq imaluunniit assigusoq. Syriami pisoq alianartoq inuit piliaraat sorsunneq, naalliutsitsineq, politikkikkut malersuinerit ilaalu ilanngullugit pissutaalluni, Demokraatinit taama oqariartuuteqartoqarpoq.

Powered by Labrador CMS