qilalukkat

Qilalukkap ingerlaarnera malinnaaffigiuk - nipiliorneralu tusaallugu

Nalunaarsuutit akustiskiusut atorlugit Pinngortitaleriffimmi ilisimatusartut qilalukkat Kangertittivarmi malinnaaffigaat.

Qilalukkat Kangertittivarmiittut malinnaaffigalugu isertugaatiginerpaasa ilaat Pinngortitaleriffimmi ilisimatuut paasisaqarfigaat.

Taakku qilalukkat nalunaaqutsersorpaat, taamaalillutik malinnaaffigisinnaavat, pingaarnertullu aamma tusarnaarlugit.

Siullermik nalunaarsuutit arfernut sisamanut ikkunneqarput, taakku tamarmik katassimasut naneqqinneqarput.

Paasisat siulliit katersorneqarlutillu misissoqqissaarneqareerput.

- Paasisanit taakkunannga arferup ingerlaarfia takusinnaavarput, qanoq ititigisumut aqqarnersoq, kussarluni ingerlaarnersoq imaluunniit kaavinnersoq - qanorlu nipiliornersoq tusaasaqarnersorlu, Outi Tervo, bloggimi narwhals2017-imi allappoq.

Ingammillu nipiliornerat soqutiginarpoq. Tassami qilalukkat nipit assigiinngitsut atortarpaat, oqaloqatigiinnerminni nipit, nerisassarsiornermi imaluunniit aqqutertik nassaariniarlugu nipiliortarlutik.

Seqqortitsisarpoq, taakkulu imaani aporfinnit arfermut utertarput. Tassa nammineerluni itissusersiuteqarpoq.

- Taakku seqqorpaluttut akisuanerannut tusarnaaraanni, arferup siunerminiittoq paasisinnaavaa - iluliaq, qilalugaq alla imaluunniit qaleralik - kiisalu taanna saaminiittoq qanoq ungasitsiginersoq paasisinnaavaa, Outi Tervo allappoq.

- Qilalugaq aalisakkamik pisariniakkaminik nassaaraangami, aalisagaq paasisaqanngitsoq qanilliartuutigalugu seqqortitseqattaarnerulersarpoq.

Naggataatigut seqqoqattaarnerit niperpalaartunngortarput, tamannalu ilisimatuut arferup nerineratut paasisarpaat.

Taakku seqqortaarnerit niperpalaaleraangata, uani allaaserisap ataani linkimi tusaasinnaavat.

Taakku nipit arferullu qanoq ititigisumiinnera ataatsimoortillugit, arfeq sumi neriniartarnersoq ilisimatuut paasisinnaavaat.

Septembarip arfernani ilisimatuut Hjørnedalimi misissuiffitsik qimallugu angerlassapput.

Kisianni nalunaarsuutit arfineq-pingasut kangerlummi suli nassaarineqanngillat, taakku nassaarineqarlutillu tiguneqartussaapput.

- Tamanna ikiortitta pikkorissup Inuuta Hemmekenip Ittoqqortoormiineersup naammassissavaa, Mads Peter Heide bloggimi allappoq.

Powered by Labrador CMS