Aasiaat
Qerisunut containerit qulingiluat Aasiaat Umiarsualivianni aserorterneqartut
Ataasinngornerup unnuaani ajortuliortut ilisimaneqanngitsut qerisunut containerit arlallit supoortui aserortersimavaat, taamaatumillu imarisaat maangaannarsinnaapput
Ataasinngornerup unnuaani ajortuliortut Aasianni Umiarsualivimmi qerisunut containerit qulingiluat aserorteriffigisimavaat.
Taamatut paasissutissiipput Qaasuitsup Politiivi.
Aserorterisut qerisunut containerit qulingiluat supoortuinut ristii aserortersimavaat.
Takunnissimasunik ujarlerput
– Taamaaliornerit soorunami inatsisinik unioqqutitsinerup saniatigut aamma sumiiffimmi inuiaqatigiinnut akisusinnaapput, containerit arlallit imarisaat maangaannassappata, Aasianni politeeqarfimmi politikommissæriugallartoq Arne Sandgreen Reimer oqarpoq.
Aasianni politiit ataasinngornerup unnuaani pasinapiluttunik takunnissimasinnaasunik imaluunniit kikkut taamaasiornerannik ilisimannittunik ujarlerput.
Politiit piffissmi kingullermi maluginiarsimavaat meeqqat inuusuttullu arlallit unnuakkut Aasiaat umiarsualivianiittartut.
– Taamaattumik inuusuttut angajoqqaavi kajumissaassavagut meeqqatik nakkutigilluarneroqqullugit, meeqqallu tamakkua unnuakkut naappattooraangatsigit aamma isumaginninnermik oqartussaasut nalunaarfigisarpavut, taanna oqarpoq.
Angajoqqaat akiliissapput
Meeqqat 15-it inorlugit ukiullit pinerluttulerinermi inatsimmi aalajangersakkat naapertorlugit pillarneqarsinnaanngillat, angajoqqaalli taarsiisussaatitaapput.
Umiartsualivimmi aserorterineq pillugu politiit telefon 70 14 24-mut sianerluni attaveqarfigineqarsinnaapput.