Qeqqata Kommuniata timersorneq siuarsarniarpaa

Meeqqerivinni, atuarfinni, utoqqaat angerlarsimaffiini, kommunillu suliffeqarfiutaanni timersornissamik periarfissaqarnerunissamik qulakkeerinnittumik, Qeqqata Kommunia aamma Kalaallit Nunaanni Timersoqatigiit Kattuffiat (GIF, aaqq.) suleqatigiinnissamut isumaqatigiissusioqqammerput.

Qeqqata Kommunia tusagassiuutinut nalunaarummi taama ilisimatitsivoq.

Kommunillu nalunaarutaa naapertorlugu, inuiaqatigiinni kikkut tamat peqqinnarnerusumik inuuneqalernissaannut ataatsimoortitsinissaq aqqutissiuussinissarlu isumaqatigiissusiornermi siunertaavoq.

- Sunngiffimminni namminneq kajumissutsiminnik sulilluartorpassuaqarpugut. Timersornermi namminneq kajumissutsiminnik sulisut pikkorissartuarnissaat, amerlanerusullu kajumilersinneqartuarnissaat uagutsinnut pingaaruteqarpoq, taama GIF-imi siulersuisuni ilaasortaq John Thorsen oqarpoq.

Suliffeqarfinni peqqinneq ukkatarineqartoq

Suliffeqarfinni peqqinneq isumaqatigiissummi ilaasoq, Qeqqata Kommunia aamma ilisimatitsivoq, kommunillu suliffeqarfippassuini peqqinnerulersitsinissamik kommunimi inuummarissaasut suliaminnit ingerlatsiinnarnissaannut GIF-imik suleqateqarneq aqqutissiuusseqataassaa.

- Kommunimi timersornerup siuarsarneqarnissaa, amerlanerusullu timersortalernissamik soqutiginnilersinneqarnissaat pillugit suleqatigiinneq nuannareqaara, kisianni pingaartumik imigassanik ikiaroornartumillu atornerluinerit pinaveersaartinneqarnissaannut kiisalu peqatigiiffinni kinguaassiutitigut kanngutsaatsuliortarnerit unitsinneqarnissaannut suleqatigiissinnaanerput nuannaarutigeqaara, borgmesteri Malik Berthelsen taama oqarpoq.

Timersortarnermi meeqqallu sunngiffiini toqqissisimasumik atugassaqartitsinissamik pilersitsiumalluni, kinguaassiutitigut kanngutsaatsuliortarnerit atornerluisarnerillu pillugit sungiusaasunut/sungiusaasut ikiortaannut paasisitsiniaasoqarnissaanik kommuni pilersaaruteqarpoq.