takornariaqarneq

Qeqqata Kommuniata takornarissat amerlanerusut pilerisaarniarpai

Qeqqata nunap immikkoortuani takornarissanut misigisassanik tuniniaanermut sinaakkutit ilaatigut kommunip aamma Arctic Circle Businessip isumasioqatigiinneranni oqaluuserineqarput

Der deltog 45 aktører indenfor turisme, fødevaresektoren, samt forskere fra Qeqqata regionen i seminaret

"Misigisanik tuniniaanermi aningaasaqarneq" pillugu Qeqqata Kommunia aamma Arctic Circle Business Kangerlussuarmi isumasioqatigiisitseqqammerpoq.

Tassami Qeqqata Kommunia aamma Arctic Circle Business naapertorlugu kommunimut takornarissat amerlanerusut qammarumallugit, takornarialerisunik, ilisimatusartunik inuussutissalerisunillu suleqateqarluni, tikitassami misigisassanik pissanganartunik amerlanerusunik pilersitsinissaq pingaaruteqarpoq.

- Qeqqata Kommuniani innuttaasut assigiinngitsunik piginnaanillit peqatigalugit, kommunitta avammut pitsaasumik nittarsaannissaanut piumassuseqarnerat isumalluarfigalugulu iluarisimaarpara, borgmesteri Malik Berthelsen (S) oqarpoq, nangillunilu:

- Kommunerput ataatsimut tamaat isigalugu takornariaqarnikkut annertusaanissamut periarfissanik ulikkaarpoq. Soorlu Maniitsumi sisoriartitsinerit, Kangerlussuarmi Sermersuarmik arsarnernillu takornariartitsinerit, Sisimiuni qimussernerit qissattariartitsinerillu. Takornarialerisut imminnut "unammisuugaluartut", suleqatigiilluta kommunitta avammut nittarsaalluarnerartigut amerlanerusunik tikisitsisalernissatsinnut periarfissagissaartugut isumaqarpunga.

Unescomit akuerineqarnissaq neriuutigineqartoq
Aasivissuit - Nipisat Kangerlussuup aamma Sisimiut akornanniittut kulturikkut eriagisassanut UNESCO-p nunarsuarmioqatigiinnut kingornussassarititaannut ilanngunneqarnissaa takornariaqarnerulernissamut neriuuteqartitsivoq:

- Aasivissuit - Nipisat kulturikkut eriagisassanut UNESCO-p nunarsuarmioqatigiinnut kingornussassarititaannut ilanngunneqarnissaa ilimanaateqarpoq, taanna nunap immikkoortuanut takornarissat amerlanerulernissaannut peqataassaaq aammalu sumiiffimmi najugaqartunut iluaqutaasumik periarfissap taassuma atorluarnissaanut takornarialerisunut sinaakkutissanik pilersitsissaagut, Malik Berthelsen oqarpoq.

Isumasioqatigiinnermi nerisassanik tunisassiornerup iluani eqimattanngorluni suleqatigiinnerup iluaqutai eqqartorneqarput, kalaallillu nerinermut kulturiata takornarissanut misigisassatut siuarsarneqarnissaa aammalu nerianiartarfinni kalaaliminernik atuinerup qaffanneqarnissaa ataatsimoorluni anguniarneqassasoq isumaqatigiissutaavoq.

Aamma atuaruk: UNESCO-p nunarsuarmioqatigiit kingornussassaannut allattorsimaffiannut uppernarsaat Kommune Kujallermit tiguneqarpoq

Powered by Labrador CMS