Qeqqata Kommuniani missingersuutit isumaqatigiissutaasut

Qeqqata Kommuniata aappaagumut aningaasartuutissai inissinniarneqarnerini, kommunalbestyrelsimut ilaasortat 15-iusut tamarmik isumaqatigiipput.

- Qeqqata Kommuniani politikkikkut ineriartortitsinissaq pillugu kinguneqarluartussamik suleqatigiilluarnitsinnut kommunalbestyrelsimi ilaasortat tamaasa borgmesterisut qutsavigerusuppakka, Hermann Berthelsen (S) oqarpoq.

Sinneqartooruteqalaartoq
Kommuni mianersortumik missingersuusiorsimavoq, kisianni kommunimi suliassaqarneq annertutinniarlugu sanaartornissamut suliniutinut inissaqartitsinissaq salliutissimallugu. Taamaakkaluartoq 2017-imi 4,5 millionit koruuninik aamma 2018-imi 9 millionit koruuninik missingersuutit sinneqartooruteqarput. 2017-imut missingersuutit katillugit 7722 millionit koruuniupput.

Atuaruk: Akiligassat akilinngitsuukkat 36 procentimik qaffassimasut

Timersorneq kulturilu
Timersorfiit kulturimullu tunngasut salliutinneqartut ilagaat. Sarfannguani multihalimik sanasoqassaaq, taanna 2018-imi piareerneqassaaq, Itillerlu aamma 2020-mi peqalissaaq. Maniitsumi majuartaatiliortoqassaaq, Sisimiuni Maniitsumilu ivigaasanik arsaattarfeqalissaaq. Aamma Sisimiut nutaamik nipilersornermut ilinniarfittaarlunilu atuakkanik atorniartarfittaasssaq.

- Atuilluartumik inuuneqarnissami peqqinneq atugarissaarnerlu tunngaviusumik pingaaruteqarput, taamaattumillu peqqissutsikkut atugarissaarnikkullu atugassarititaasunik innuttaasunut tamanut pitsanngorsaanissaminik Qeqqata Kommunia suliniuteqarpoq, kommuni tusagassiuutinut nalunaarummi allappoq.

Atuaruk: Qeqqata Kommuniata suliniutinut aqutsisutsialaat akissarsitipaat

Utoqqarnut pillorissaaneq
Illuutit aserfallatsaalineqarnissaannut aamma 13 millionit koruuninik immikkoortitsisoqarpoq, taakkulu nukissiuutinik annikinnerusumik atuinissamik, illullu iluini silaannaq pitsaanerulersissavaat.

Kommunip aamma naggataatigut erseqqissarpaa, Sisimiuni Maniitsumilu utoqqaat angerlarsimaffiini pillorissaasunik atorfinitsitsisoqassasoq, utoqqaallu nammineersinnaanerunissaannut ikiuisuussapput.

Atuaruk: Kangerlussuaq nutaamik umiarsualivittaassaaq

Ukiuni sisamani oqimaaqatigiissaarineq
Siunissamulli ungasinnerulaamut qiviaraanni, 2019-imi aamma 2020-mi missingersuutit amigartuulaarnissaat pilersaarutaavoq. Ataatsimulli isigalugu oqimaaqatigiissapput, ukiunilu sisamani akileraarutit qaffanneqarnatik ingerlasinnaapput.

-Akileraarutip allanngortinnginneqarneratigut, kommunillu aningaasaqarnerata oqimaaqatigiissinnera tamanut aallaavissaqqissoq upperaarput, taamak Hermann Berthelsen (S) oqarpoq.