Air Greenland

Qeqertarsuup Tunuanit angalaniartut 72-it suli unittooqqapput - isornartorsiuinerit Air Greenlandimit eqqunnginnerarneqarput

Atortorissaarutit pissutaallutik Qeqertarsuup Tunuani angallassinerit unitsinneqanngitsut Air Greenlandip pisortaanerata oqaatigaa. Silali pissutaalluni angallassisoqarsinnaasimanngitsoq naqissuserlugu. Ilaasunut paasissutissiinerit amigarsimaneri utoqqatsissutigaa, kiisalu aamma oqaatigalugu Bell 212-it nutarsarneqarnissaat pisariaqalersinnaaneralugu

Air Greenlandimi pisortaaneq, Michael Højgaard

Qeqertarsuup Tunuanit angalaniartut 72-it unittooqqasut Air Greenland ilisimatitsisvoq.

- Sila pissutaalluni Qeqertarsuup Tunuani sumiiffinni assigiinngitsuni angalaniartut 72-t unittooqqagallarput. Teknikkikkut atortorissaarutit pissutaallutik kinguaattoortoqanngilaq. Atortorissaarusimmi pigaagut. Timmisartortartoqarpoq, kisianni tassa sila pissutaavoq angallassisoqannginneranut. Tallimanngornermi akunnerulluunniit naanerani angallassisoqarsinnaassappat angallassisoqassaaq, Air Greenlandip pisortaanera Michael Højgaard Sermitsiaq.AG-mut oqarpoq.

Paasissutissiisarnerit pitsaanerulissapput
Sila pissutaalluni angallassisoqanngilaq. Aammali ilaasussanut paasissutissiisarnerit isornartorsiorneqarput.

- Kinguaattoornerit nalunaarutigisarnissaat pitsaanerulissaaq. Ilaasummi mittarfiliaraangata sulisoqartariaqarpoq paasissutissiisinnaasunik. Taamaattumik pitsanngorsaqqiisarnerit suli ingerlanneqartuassapput, Michael Højgaard oqarpoq.

Qulimiguullit Qeqertarsuup Tunuani atorneqartut Michael Højgaardip nutaanngilisimannginnerarpai.

- Qulimiguullit Bell 212-it 1980-imeersuupput. Nutaajunngikkaluartoq misilittarluarneqareerpoq, kisianni nutarsarneqarnissaa pisariaqarpoq. Visual Flight Rules atorlugit Air Greenland timmisartuussisarpoq, tassa qulimiguulimmut maleruagassaq VFR-imik taaneqartartoq.

Kangerlussuarmi takornariartitsinerit
Air Greenlandimi ilaasussat arlaqartut tupigaat, sooq Air Greenlandip qulimiguua S-61 Kangerluassuarmi takornariartitsilluni timmisartuusseqattaarsimanersoq, naak sumiiffinni assigiinngitsuni timmisartuussinissat unitsiinnarneqarsimagaluartut.

- S-61 aamma Qeqertarsuup Tunuani timmisartuussisimanavianngikkaluarpoq. S-61 aamma kisimi annaassiniarnerni atorneqartarpoq, tamanna isumaqatigiissummi allaqqavoq, Michael Højgaard oqarpoq.

Qeqertarsuup Tunuani timmisartuussinerit akisupput, taamaammat ilaasussat angalanissaminnut akigitinneqartoq tamaat akilerneq ajorpaat, tassami Namminersorlutik Oqartussat tapeeqataasarpoq. Qulimiguulinnik nutaanik pisiniaraanni aamma aningaasartuutigineqartussat eqqumaffigineqartussaapput.

Isornartorsiuisut paasisinnaavai
- Air Greenlandimi sinneqartoortaraluarluta sooq timmisartunik nutaanik pisineq ajornersugut tupigusuuteqartut paasisinnaavakka. Qulimiguullit tamarmik taarserneqassappata 40 million koruuninit 45 million koruunit tikillugit aningaasartuuteqartariaqalissaagut. Namminersorlutik Oqartussanik isumaqatigiissuteqarnitta pissutigisaanik aningaasartuutit isertitallu ataqatigiisittariaqarpagut. Taamaattumik nutaanik pisisoqassappat aningaasaliisoqaqqaartariaqarpoq, Air Greenlandip pisortaanera oqarpoq.

Powered by Labrador CMS