Qeqertarsuatsiaamiut imigassaq aamma hashi akiorniarpaat
Nunaqarfimmi innuttaasut inuuniarnikkut peqqissutsikkullu ajornartorsiuterpassuarnik qaangiiniarlutik suliniuteqarniarput, rubinisiorfissap Aappaluttup siunissami nunaqarfimmiunut annerpaamik iluaqutigineqalernissaa siunertaralugu.
Qeqertarsuatsiaani innuttaasut ulluni marlunni imigassaq, ikiaroornartoq hashi aamma aningaasanoorajuttuunermut apeqqutit oqimaatsut oqaluuseraat.
Inuuniarnikkut peqqinnikkullu ukiorpassuarni nunaqarfimmi ajornartorsiutaasimasut qaangernissaat siunertaavoq.
'Ajornartorsiuterujussuaq'
Ataatsimeersuarnermi peqataapput politikerit atorfilittallu Kommuneqarfik Sermersuumiit, Peqqinnissaqarfimmiit, Politiinit, Nunaqarfinni Aqutsisut aamma nunaqarfimmi innuttaasut ilaat.
Imigassamik, ikiaroornartumik hashimik aamma aningaasanoorajunnermik ajornartorsiutit 'ajornartorsiutit sukumiinerit ilaattut' Kommuneqarfik Sermersuup tusagassiuutinut nalunaarummi oqaatigai.
Saqqummiinerit arlallit kingorna innuttaasut namminneq eqimattakkaarlutik pinaveersaartitsilluni iliuuseqarnerup qanoq nukittorsarneqarnissaanut siunnersuuteqarput.
Rubinisiorfik neriuuteqartitsivoq
Nunaqarfimmi Aqutsisut rubinisiorfimmit Aappaluttumit aallartingajalersumit Qeqertarsuatsiaat iluaquteqarsinnaasoq neriuuteqarfigalugu siornatigut oqaatigineqareerpoq.
Tamannali atorluarniaraanni atornerluinermut ajornartorsiutit qaangerneqaqqaartariaqarput, Qeqertarsuatsiaani aamma Kapisilinni Nunaqarfinni Aqutsisut siulersuisuat Jonathan Jakobsen isumaqarpoq.
- Rubinisiorfissap Aappaluttumiittup siunissami suliffissanik nunaqarfitsinnut pilersitsisinnaanerinnaaluunniit eqqarsaatigalugu, Qeqertarsuatsiaani inuuniarnikkut peqqissutsikkullu ajornartorsiutit takussaagaluttuinnartullu sulissutigalutigit aaqqeeqataaffigisariaqarpavut, ataatsimiinnermi saqqummiinermini taanna oqarpoq.
Isumaqatigiissut Namminersorlutik Oqartussanut Kommuneqarfik Sermersuumullu nassiunneqassapput.
Qeqertarsuatsiaani Peqqinneq pillugu ataatsimeersuarneq Kommuneqarfik Sermersuumi Isumaginninnikkut, Suliffeqarnikkut Inuussutissarsiornikkullu ingerlatsivimmit aaqqissuunneqarpoq.