Qeqertarsuarmi Uummannamilu qernertanik qilalugarniarneq ammarneqarpoq
Piniartut arfanniarnermut allagartallit neriuutissaqalerput. Qeqertarsuarmi Uummannamilu qernertanik qilalugarniarneq ammarneqarpoq. Aasianni kisimi pinnani
Qeqertarsuarmi Uummannamilu piniartut peqatigiiffiit piniarnermillu nakkutilliisut ataatsimeeqatigereerlugit Aalisarnermut, Piniarnermut Nunalerinermullu Naalakkersuisoqarfik ingerlatsivinni Qeqertarsuarmi Uummannamilu piniarnermut paasissutissanik eqqortunik tunineqarpoq.
Taamaattumik ingerlatsivinni taaneqartuni qernertanik qilalugarniarneq ingerlaannavik atulersumik ammarneqarpoq.
Taamatut naalakkersuisoqarfik tusagassiorfinnut nalunaarutikkut paasissutissiivoq.
Qeqertarsuup Tunuani qernertanik qilalugarniarneq pingaartumik pisarpoq Imerissut eqqaanni, ingerlatsivimmi Qeqertarsuup Tunuani piniartut amerlanerpaat peqataaffigisartagaannik. Taamaattumik ingerlatsivinnit allanit piniartunik ataatsimut pisaqatarneq pinngitsoortikkuminaattartorujussuuvoq. Isumaqatigiinngitsoqaraangat pisaq kiap nalunaarutigissaneraa, taava aalajangeruminaattarpoq pisaq ingerlatsivimmit sorlermit pisassanit ilanngaatigineqassanersoq.
Ataatsimiinnermi oqaluuserineqarpoq siunissami qanoq qaqortanik qernertanillu qilalugartat, immaqa kommunimi malittarisassat malillugit aalajangersarneqarsinnaanersut, taamaasilluni pisat upperinartumik nalunaarutigineqartassallutik.
Aamma atuaruk: Qernertanik qilalugartassat qaangerneqarput - akuersissutit atorunnaarsinneqarput
Kommunip piniarnermillu nakkutilliisut pisat nalunaarutigineqarsimanngitsut annertunerusumik paasisaqarfigaat, Naalakkersuisoqarfiullu Uummannami tamanna malitseqartissavaa ataasiakkaanut allakkatigut.
Aasiannit pisat nalunaarutigineqarnissaat naalakkersuisoqarfiup suli utaqqivai.
Pisanik nalunaarutit eqqortut naalakkersuisoqarfimmut nalunaarutigineqareerpata ingerlatsivimmi qernertanik qilalugarniarnerup ammarneqarnera nalunaarutigineqarumaarpoq.
Sumiiffinni tamani piniarnermik nakkutilliisoqassaaq.
Aalisarnermut, Piniarnermut Nunalerinermullu Naalakkersuisoqarfiup tallimanngormat siuliani nalunaarutigaa qernertanik qilalugarniarneq ingerlaannavik unitsinneqartoq, ingerlatsivinnit Qeqertarsuup Tunuanit Uummannamillu pisat nalunaarutigineqarsimannginnerat pissutigalugu.