sulisunik amigaateqartut
Qeqertarsuarmi arsaattarfissaq kinguaattoortoq
Namminneq piumassutsiminnik ikiuuttut ikippallaarneri pissutaalluni ivigaaqqanik qallikkamik arsaattarfissap atoqqaartinneqarnissaa augustip qiteqqunnerata missaani pissaaq
Qeqertarsuup arsaattarfiata ivigaaqqanik qallersorneqarnissaanut aasaq tamaat suliaralugu ulapaartoqarpoq. Juunip aallartinnerani arsaattarfiup suliaralugu aallartinnerani namminneerlutik piumassutsiminnik ikiuuttut amerlalluinnaraluartut, piffissaq kingulleq ikiliartuinnarsimapput.
Tamannalu arsaattarfissap suliarineranut sunniuteqarpoq. Taamaattumk arsaattarfiup qilanaarineqaqisup ivigaaqqanik qallikkap atoqqaartinneqarnissaa qaammatip ataatsip missaannik kinguaattoorfiusussanngorpoq.
- Taamaakkaluartoq kingaallannata ulappuppugut. Inuit feriarlutik aallartipput aammali sila assut alianaattarpoq, inuillu ilaquttatik ilangalugit asimiikkumanerusarunarput. Ikiuuttullu ikinnerulernerannut tamanna peqqutaanerpaagunarpoq, Timooq Mølgaard, arsaattarfissap siulersuisuini siulittaasup tullia oqarpoq.
Kinguaariit nutaat
Arsaattarfik aasaq tamaat ujaraaqqanik sioqqanillu qallersorneqarpoq, atortussallu, soorlu ivigaasat, maanna Danmarkimiit nassiunneqarsimalerput.
- Illoqarfipput pitsaalluinnartunik arsaattartoqarpoq, taakkuli aasaq tamaat arsaaffissaqarnikuunngillat. Kisiannili qaammatip tullia arsaattarfik ivigaaqqanik qallingaq atoqqaartinneqalerpat, nuannerluinnartumik arsarfissaqalissapput, tamannalu tamatta qilanaaraarput, Timooq Mølgaard oqarpoq.
Arsaattarfissaq meeqqanut annertuumik sunniuteqarumaartoq, Jens Mølgaard, G-44-mi siulittaasoq oqarpoq.
- Nuna tamakkerlugu isikkamik arsaannermik unamminerni arsaattartortagut pitsaasumik angusaqartarput. Qularutiginngilaralu arsaattarfissarput kinguaariinnut tullernut annertuumik sunniuteqarumaartoq, taakkumi maannakkornit suli pitsaanerusumik atugassaqalissapput, Jens Mølgaard oqarpoq.
Jens Salling, 2.5 millioner kruuninik aamma Polar Seafood 500.000 kruuninik arsaattarfissamut tunissuteqartuupput.