Kommune Qeqertalik
Qeqertalimmi Aasiaat 'qitiunissaa' IA-meersup innersuutigaa
Kommune Qeqertalimmi Aasiaat qitiusumik allaffinngornissaanut, kommunimi politikerip Qasigiannguaneersoq siunnersuuteqarpoq
Januaarip aallaqqaataani Qaasuitsup Kommunia marlunnut avinneqassaaq.
Kommune Qeqertaliup Kangaatsiaq, Aasiaat, Qeqertarsuaq aamma Qasigiannguit illoqarfittarissavai, Avannaata Kommuniatalu Qaanaaq, Upernavik, Uummannaq aamma Ilulissat illoqarfittarissallugit.
Ikaarsaariarnermut ataatsimiititaliamut ilaasortaq, Kristian Jeremiassen (IA) Qasigiannguaneersoq, Aasiaat kommunimi qitiusumik allaffeqarfiussasoq siunnersuuteqarpoq.
Atuaruk: Avannaata Kommunia og Kommune Qeqertalik
Aasiannukarnissaq ajornannginnerpaasoq
- Aasiaat inuttunerpaajuvoq Aasiaat borgmestereqarfinngorpat pissusissamisuussaaq, Kristian Jeremiassen tusagassiuutinut nalunaarummi allappoq.
Aasiannukarnissarlu aamma pisariinnerpaasoq, taassuma erseqqissarpaa.
- Aasiaat kommunitaatsinni periarfissagissaarnersaavoq angallannikkut tikiffigissallugu umiarsuakkut timmisartukkullu, taamaalilluni Aasiaat tikikkuminartuunini iluaqutigissavaa inunnik aalajangersimasunik Naalakkersuisut, Inatsisartunut ilaasortat, suliffeqarfissuarni pisortat tikinneqarsinnaanini kommunitsinnullu tamanna iluaqutaassaaq.
- Manna tikillugu politikkkut ikaarsaariarnermi ataatsimiititaliami aalajangiiffinginikuunngilarput Aasiaat qitiusumik allaffeqarfiussasoq. Qitiusumik allaffeqarfik innuttaasut sumiissanersoq paasisariaqarpaat, Kristian Jeremiassen oqarpoq, tamannalu pillugu aalajangiisoqangajalissasoq taassuma neriuutigaa.