Qeqertalik: Kommunip utoqqartaanut atugassat pitsaanerusut
Kommune Qeqertalik, 70-nit ikinnerulaartunik utoqqartaqartoq, utoqqaat atugaasa pitsaanerulersinneqarnissaannik sulissutiginnippoq. Ilaatigut utoqqaat pillugit siunnersuisoqatigiinnik pilersitsisoqassaaq aammalu inissianik utoqqarnut naleqquttunik sanaartortoqassalluni
Kommune Qeqertalimmi, 6.533-nik innuttaqartumi, 65-it sinnerlugit ukiullit innuttaasut 10 procentiisa missaraat, 2018-mullu utoqqarnut atugassat aningaasat 55 millioner koruunit missaanniipput, Sermitsiaq allappoq.
Kommune Qeqertalimmi utoqqaat eqimattanut marlunnut avinneqarsimapput, utoqqaat nukarliunerusut 65-niit 74-nut ukiullit, inuussutissarsiorluni sulisartumiit pitsaasumik naleqarluartumillu utoqqalinissamut ikaarsaariartinneqartussat, aammalu utoqqaat angajulliunerusut 75-niit qummut ukiullit, pitsaasumik naleqarluartumillu utoqqalinerminni
tapersersorneqartussat.
Borgmesteri Ane Hansen oqaluttuarpoq, kommune, avannaani kommunerujussuup avinneqarnerata kingorna nutaajulluinnartoq, piffissami matumani utoqqarnut politikkissamik sanarfileruttortoq:
– Kommunerput nutaaq naqqaniit iluarsartuutileruttorparput, kommunillu pinngoriartornerata nalaaniit innuttaasut atugaat pillugit misissuinerit annertoorujussuit ingerlannikuuavut, ilaatigullu kommunitsinni utoqqartavut qanoq inuuneqarnersut annertuumik paasiniaanikuuvugut. Maanna piffissanngorpoq kommunip utoqqarnut politikkissaanik pilersitsinissatsinnut. Tassunga tunngatillugu pilersaaruteqarpugut utoqqaat pillugit siunnersuisoqatigiinnik pilersitsissalluta, taakkulu pisussaaffigissavaat ataavartumik utoqqartatta qanoq inuuneqarnerannik ilisimaarinnissallutik, borgmester Ane Hansen (IA) oqarpoq.
Allaaserineqartoq tamakkiisumik aviisimi Sermitsiami atuarneqarsinnaavoq. Aviisi uani pisiariuk: