upalungaarsimaneq

Qatserisartut atugassarititaat pitsaanerulertariaqarnerat piumasarineqartoq

- Nunatsinnimi qatserisartut 900-it missaaniittut ullut tamaasa sillimasut toqu ajaperlugulusooq inuiaqatigiinnik sullissisut annertuumik sammineqartariaqarput, qatserisartut peqatigiiffiata siulittaasua oqarpoq

Qineqqusaarnermi qatserisartut atugaat ataasinnguamilluunnit qissiminneqannginnissaat naatsorsuutigineqarsinnaavoq, tamannami qineqqusaarnerni kingullerni takusareernikuuarput. Taamaattussaanngikkaluarpoq. Qatserisartut pitsaanerusunik illersuuteqartinneqartariaqarput, suliaammi navianartuupput.

Kalaallit Nunaanni Qatserisartut Peqatigiiffianni siulittaasoq Poul Olsen tusagassiutinut nalunaaruteqarpoq.

- 2006-mi LeMasters-ip misissuinerani takuneqarsinnaavoq qatserisartut suliffeqarfinnut ulluinnarnilu nalinginnaasumik inuuneqartunit nappaammik kræftimik eqqugaasinnaanerat procenterpassuarnik ilimanaateqarnerusut, Poul Olsen oqarpoq.

Qatserisartut kræftinik makkuninnga ilaatigut ima annertutigisumik eqqorneqarsinnaanerat ilimanaateqarneruvoq:

  • Ammikkut kræfteqalersinnaaneq procentinik qaffasinneruvoq
  • Issuutigut kræfteqalersinnaaneq 102 procentinik qaffasinneruvoq
  • Lymfe (imerajukkut) kræfteqalersinnaaneq 51 procentinik qaffasinneruvoq
  • Patikkut kræfteqalersinnaaneq 52 procentinik qaffasinneruvoq
  • Qaratsakkut kræfteqalersinnaaneq 32 procentinik qaffasinneruvoq

- Taamaattumik nunatsinni upalungaarsimanissamik suliaqartuusut atugassaqartitaanerat suusupagineqartutut inissisimasoq pimoorussamik eqqummaariffigineqarnerusariaqalerput. Ukiumi 30-nik issittoq gumminik isikkamikkut illersuusiinnarlugit sulisinneqarsinnaanngillat, kemikaalianik ajutoortoqarnerani immikkut illersuuteqartinnagit sulisinneqaannarneqarsinnaanngillat, minnerunngitsumillu qaammammut ilaatigut 300 kr. angullugu taamaallaat ajunngitsorsiaqartinneqartarnerat akuersaarneqaannarneqarsinnaajunnaarpoq, inuppalaaranilu. Taamaattumik poltik-imut iserniullutik sassartut eqqaamasariaqarpaat upalungaarsimanermik suliaqarneq tassaannaanngimmat SAR-imik suliaqarneq.

- Nunatsinnimi inuit 900 missaaniittut ullut tamaasa sillimasut toqu ajaperlugulusooq inuiaqatigiinnik sullissisut annertuumik sammineqartariaqarput aamma. Inuit 900 taakku nunatsinni innuttaasut tamarluinnaasa toqqissisimanissaat isumagisassaraat, Poul Olsen oqarpoq.

Powered by Labrador CMS