Qassimiuaarneq: Siunissaq oqaluuserineqassaaq

Innuttaasut ataatsimiinneranni Qassimiuaarnermi ullumi pingasunngornermi oqaluuserisassat oqimaatsuupput.

Ataatsimiinneq, sulinermik inuussutissarsiuteqartut kattuffiata SIK-p aaqqissuussaa, timersortarfissuarmi Inussivimmi nalunaaqutaq 10.00-imiit ingerlanneqassaaq.

Ulloq aallarnerlugu Kalaallit Nunaanni attaveqarneq pillugu oqalugiassapput Kuno Fencker, Aluu Airlines, Air Greenlandillu pisortaa Michael Højgaard. Tassani oqaluuserissavaat mittarfiit, mittarfeqarnikkullu nunami periarfissat.

Visit Greenlandip Nunatsinnilu akunnittarfiit assigiinngitsut, siunissami takornariaqarneq siuariartornissarlu oqaluuserissavaat.

Aatsitassarsiorneq

Aamma oqalugiaatigineqassaaq siunissami aatsitassarsiorneq, qanorlu isilluni isumaqatigiissutit aqqutigalugit suliassaqartitsinermik periarfissanillu pilersitsisoqarsinnaanersoq.

Sammisaq ataaseq Kalaallit Nunaanni innuttaasunik avissaartitsisoq, tassalu uranimik piiaanissaq, ullumi ataatsimiinnermi aamma oqaluuserineqassaaq. Tassani aamma canadamiut uranimik piiaaffinnik misilittakkatik saqqummiutissavaat.

Innuttaasut ataatsimiinneranni oqimaatsuinnaat sammineqanngillat, aamma scenemit aliikkusersuisoqassaaq.

Ullumikkut pissussat nalunaaqutaq 19.00 naassapput.