Qassiarsuk
Qassiarsummiut ´Utoqqartaat Imaannaanngitsoq´ peeruppoq
Savaatiliusimasoq Qassiarsummilu ajoqiusimasoq, nunaqarfimmillu tunngaviliisut Elisabeth aamma Otto Frederiksenip kinguaavisa nunngutaat, Erik Røde Frederiksen sisamanngormat anerningerpoq
Erik Røde Frederiksenip eqqaamaneqaatissaraa inussiarnersumik pissuseqartuunini, aammattaarli nunaqarfiup kunngiatut, taamatullu inissisimanini pissutigalugu kunnginik, dronninginik, præsidentinik, ministeriunernik upperisarsoqatigiillu allat siuttuinik tikeraartoqaraangat tikilluaqqusisuusarsimanini.
Taanna Qassiarsummi savaatiliusimavoq, kingornalu nunaqarfiup oqaluffiani ´tiguinnakkatut´ ajoqiusimalluni. Tamatumalu saniatigut kommunalbestyrelsimut ilaasortaasimavoq.
Nersornaammik nersornaasigaasimavoq
Elisabeth aamma Otto Frederiksenikkut ernertik tassani najugaqarsimasumut, qallunaatsiaamut Erik Aappalaartumut (Erik den Røde), ukioq 1000-p missaani ivikkanik naggorissoqarfimmut tassunga nunassissimasumut, atsiussimavaat, taassumalu nunaqarfik atsersimavaa Brattalid.
Erik Røde Frederiksen sisamanngormat ullaassakkut Narsap napparsimmaviani anerningerpoq, piffissami sivisuumi sanngiillioreersimalluni, anerningermallu ilaqutaasa qaninnerpaat ilagaat. Derik Røde Frederiksen 89-inik ukioqarluni toquvoq.
Nammineq kissaatigisaa malillugu Qassiarsuup iliveqarfiani nuliami Helgap ilerrata saniani ilineqassaaq. Erik Røde Frederiksen siusinnerusukkut Dronningens belønningsmedalje-mik sølvimik, Nersornaammillu sølvimik, nersornaaserneqarnikuuvoq.