Qeqqata Kommunia
Qarasaasiaq tigummiartagaq atuartunut kajumissaataavoq
Atuartitsinermi iPadit atorneqartalernerisa kingorna, Qeqqata Kommuniani meeqqat atuarfiini atuarneq kivinneqarpoq.
- iPad sakkussatut pigalugu pitsaasuuvoq. Atuartut aallussilluartillutik, taava suliassanik naammassinninnissaq pitsaanerusarpoq, aammalu sakkussat amerlasuut pigitillugit,
assersuutigalugu seqersittakkat atorsinnaavavut saqqummiussillutalu. Taakku atuartut aallussinissaanut pitsaasuupput.
Sisimiuni Nalunnguarfiup Atuarfiani ilinniartitsisoq, Seth Skifte, aamma iPadinik atuinermik ilitsersuisuusoq taama oqarpoq.
Ullut tamaasa iPad atortarpaa, aamma fagini allani ilinniartitsiffigisamini atorsinnaasarpaa.
Meeqqat atuarfiat kivitseqataaffigineqartoq
Meeqqat atuarfiini atuartitsinermut kivitseqataavoq, atuartullu iPad-imik atuinerat atuartitsinermi peqataanerulersitsisutut nalilerneqartoq, Qeqqata Kommunia tusagassiuutinut nalunaarummi allappoq.
- Atuartitsinermi video, nipit, assit assigisaallu atorneqarajuttarput, atuartunillu iPad paasissutissanik ujartuinermut, saqqummiinernut, sammisassanut eqqarsarnartunut allaaserinninnernullu atorneqarajuttarpoq. Taamaalilluni atuartitsinermi sungiussititsiniarneq annerusartoq, ilinniartitsisunit apersorneqartunit nalilerneqarpoq, tamanna erseqqissaatigineqarpoq.
Taamatuttaaq iPad-ip atorneqarnerani atuartut ilikkagassatigut pissarsiaat pitsanngoriangaatsiartutut nalilerneqarpoq.
- Atuartut kajumissuseqarluarput aammalu namminneerlutik nutaanik misileraanissartik nuannaralugu. Taamaaliornikkut atuartitsinermi malinnaanerulernerat ilinniartitsisunit maluginiarneqarpoq, tamanna Qeqqata Kommunianit oqaatigineqarpoq.