ajunaarnersuaq

Qaqqap sisoorsinnaasup peerneqarsinnaaneranik misissuineq aallarteruttorpoq

Arfininngormat unnukkut qaqqap sisoortup saniatigut aamma Uummannap Kangerluani qaqqamik sisooriaannarmik paasisaqartoqarpoq. Upalungaarsimasut, Issittumi Sakkutooqarfiup Politiillu sumiiffik alapernaarsorpaat, sumiiffinnilu eqqaaniittuni innuttaasunut paasissutissanik ingerlaavartumik nassiussisarlutik

Pinngortitamut Avatangiisinullu Naalakkersuisoqarfiup GEUS ’De Nationale Geologiske Undersøgelser for Danmark og Grønland’ suleqatigalugu Uummannap Kangerluani qaqqamiit sisoortoqaqqissinnaanera nalilersuiffigaa.

- Tassunga ilanngullugu qaarsoq aarlerissutaasoq peerneqarsinnaanersoq misissuiffigineqassaaq. Ulloq unnuarlu sulisoqarpoq, aammalu Asiaq-mit, Norges Geologiske Institutimit (NGI), USA-mit aamma Schweizimit immikkut ilisimasalinnik suleqataatitsisoqassaaq. Suliaq pisariusuuvoq, kisiannili suleqataasunit tamanit annertuumik suliniuteqartoqarpoq, Namminersorlutik Oqartussat tusagassiuutinut nalunaarummi allapput.

Arfininngormat unnukkut qaqqap sisoortup saniatigut aamma Uummannap Kangerluani qaqqamik sisooriaannarmik paasisaqartoqartoq ilisimatitsissutigineqarpoq.

- Inuppassuit maannarpiaq pisunit attortisimapput. Qaqqap misissuiffigineqarnera pissutsit qanoq iliorlugit aaqqinneqarsinnaanerinik, taamaalillunilu sumiiffinni eqqorneqartuni innuttaasut qanoq iliorluni piaartumik nalinginnaasumik toqqissisimanartumillu ulluinnarni inuuneqaleqqinnissaannik paasiniaanermut tapertaassaaq, Namminersorlutik Oqartussat nalunaaruteqarput.

Powered by Labrador CMS