ajunaarnersuaq
Qaqqap sisoornerata kingorna Løkke ikiueqqinnissamik neriorsuuteqarpoq
Uummannap sulluani ajornartorsiortut ikiorneqaqqinnissamik pisariaqartitsilissappata, ikiorneqarnissaat neriorsuutigaa.
Qaqqap sisooqqinnissaanut Uummannap eqqaani nunaqarfiit ulorianartorsiornerini Danmarkimit ikiueqqinnissamik neriorsuisoqarpoq.
Inuit sumiiffimmiittut sumiginnarneqassanngitsut, ministeriuneq Lars Løkke Rasmussen ualimut naqissusiivoq.
- Pisut qanimut malinnaaffigaagut, pisariaqartitsisoqaqqilissappallu ikiuinissamut piareersimavugut, ministeriunermit tusagassiuutinut nalunaarummi tamanna allaqqavoq.
Kalaallit danskillu oqartussat sumiiffiit eqqorneqartut ikiorniarlugit qanimut suleqatigiipput. Danmarkimit ilaatigut politiinik aallartitsisoqarpoq, illersornissaqarfillu umiarsuarnik timmisartunillu aggertitsivoq.
Lars Løkke Rasmussenip sapaatiummat ullumilu Naalakkersuisut siulittaasuat, Kim Kielsen attaveqarfigisimavaa.
- Taanna piffimmiippoq, pisunillu sunnerteqqasorujussuulluni, kalaallit danskillu upalungaarsimanermut oqartussaat ilungersunartumik atugaqarlutik ataatsimut annertuumik iliuuseqartut oqaluttuaraa.
- Tamanna imaannaanngilluinnarpoq, ataqqinnilluinnarpungalu. Tamatuma saniatigut kajumissutsimik Kalaallit Nunaannut isumassuisut nuannaarutigilluinnarpakka, ministeriunerup tusagassiuutinut nalunaarutaani tamanna allaqqavoq.
Sisoortoqaqqinnissaata ulorianarnera pissutigalugu danskit sakkutuuisa umiarsuaat ''Vædderen'' aamma ''Ejnar Mikkelsen'' nunaqarfimmiut kangerlunniittut angallassimavaat.
- Eqqarsaatikka eqqugaasuniipput, angerlarsimaffimminnik inuuniarnermullu tunngaviminnik annaasaqarsimasut. Illorsuarni aamma Niaqornani innuttaasut eqqarsaatinniipput, qaqqap sisooratarsinnaanera pissutigalugu taakku tuaviortumik angerlarsimaffimminnit qimagussorneqarsimapput, Lars Løkke Rasmussen oqarpoq.