Pinnngortitami ajunaarnersuaq
Qaqqap nakkaanissaa siumugaaq oqaatigereerneqarsinnaava? Norgemi taamaasiortoqarpoq
Kalaallit Nunaanni taamaasiornissaq ajornarnerusoq GEUS-ip pisortaata tullia, Namminersorlutik Oqartussat Issittumilu sakkutuut sulinerat nalilersoriartorlugu Nuummeeqqammersoq oqarpoq.
Norgemi qaqqat arfineq-marluk nakkaariaannaasut nakkutigiuarneqarput.
Nakkutilliinissaq pisortaqarfiup, Norges Vassdrags- og Energidirektoratet (NVE)-p, isumagisaraa. Norgemi nunaqarfinni Nesdalimi aamma Bødalimi qaarsortarujussuaq kubikmeterit millionit missaanniittoq qaqqami Ramne-fjeldemit 800 meterisut portutigisumi kaanngarluni malerujussuarmik 70 meterisut portutigisumik pilersitsilluni 1936-mi nakkaammat illut aqquserngillu qarsunneqarput nusunneqarlutillu.
Taassuma pineranit ukiut marluk sioqqullugu, tassa 1934-mi, kangerlummi Tafjordenimi qaqqap ilamernga nakkaammat inuit 40-t ajunaarput.
Nakkaannginnerani mianersoqqusisarneq
Nuugaatsiami qaqqap nakkaanera sioqqulugu pasitsaanneqarsinnaasimanersoq apeqqutigigatsigu atortut eqqortut atorlugit taamaasiortoqarsinnaasimagaluartoq Lene Kristensen oqarpoq.
– Nuugaatsiap eqqaani uuttuutinik ikkussuisoqarsimagaluarpat mianersoqqusinissaq periarfissaqarsimassagaluarpoq. Atortulersornerli akisuvoq Kalaallit Nunaallu angisoorujussuulluni, Lene Kristensen oqarpoq.
Allaaserisaq Sermitsiaq aviisimi kingullermi saqqummertumi tamaat atuaruk: