Nuuk Mountain Challenge
Qaqqani arpatitsinissanut Nuuk piareerpoq
Oqilaniunneq aappassaa ingerlanneqartussaq sapaatiuppat aallartissaaq
Nuuk Mountain Challenge sapaatiuppat aallartinneqarpat sukkasuumik unammisoqassasoq naatsorsuutigineqassaaq.
Qaqqani oqilaniunneq Nuup sisorartarfianit nalunaaqutaq 11.00 aallartissaaq, Ukkusissat aamma Quassussuaq qaqineqassallutik.
Arpaqataasussat 100-ut missaanniissasut aaqqissuisunit naatsorsuutigineqarpoq.
Angut inuusuttoq Philip Baadh Juhl Quassussuarmut ukioq kingulleq qaqeqqaarpoq, Michael Heilmannimit siulliulaarluni qaqilluni.
Ukkusissanut qaqeqqaartoq nutaaq ukioq manna nassaarineqassaaq, OL-imi ukioq peqataasoq Martin Møller Nuummit aallaqqanini pissutigalugu oqilaniunnermi peqataassanani.
- Ukkusissat aputeqangaatsiarnera pissutaalluni qaqiniarnissaa ukioq kingullermit ajornakusoornerussaaq. Aput aqippoq, oqilaniuttunut sukataartitsingaatsiarumaarluni, Finn Meinel mianersoqqusivoq.
Oqilaniunneq sukkasooq
Martin Møller Ukkusissat ukioq kingulleq qaqeqqaaramiuk oqilaniunneq 51,29 minutsit atorpai. Aappaattut inissippoq Jesper Christiansen 1.03,58 tiimit atorlugit, Lars Henrik Nielsenilu pingajuattut inissikkami 1.04,20 tiimit atorlugit.
Arnani Niviaq Chemnitz Berthelsen ukioq kingulleq ajugaavoq, 1.06,05 tiimit atorlugit. Ivalo Rosing aappaattut inissikkami 1.22,13 tiimit atorpai kiisalu Aviaja Heilmann pingajuattut inissikkami 1.29,39 tiimit atorlugit.