assit takukkit
Qaqortumi nanoq inuilaamut qimaatippaat
Kujataani politiit ilimagaat inoqarfiit ungasinngisaanni nannut arlariiusinnaasut
Nanoq Qaqortumiit 5 kilometerinik ungasitsigisumi sapaammi takuneqartoq Qaqortoq qimallugu ingerlaqqippoq sapaatillu kingorna suli takuneqarani. Imaassinnaavorli Qaqortup Narsallu eqqaanni nannut arlariiusut.
Atuaruk: Politiit mianersoqqusipput: Aallaaserlusi
Qaqortumiit avannamut kangimut 5 kilometerinik ungasitsigisumi nanoq takuneqartoq ungoorneqarluni inuilaamut ingerlaqqippoq. Nanoq aallaaneqanngilaq kujataani nannuttassat sisamaasut martsimili tamakkerneqareernikuummata.
Atuaruk: Qaqortup eqqaani nanoq
Nannut arlallit
- Umiatsiat arlariillutik nanoq Qaqortup eqqaaniit ungoorpaat. Saqqaarsimmi nunamut qaqinermi kingorna takuneqaqqinngilaq, kujataani politiit pisortaat Bent Ole Kleist Sermitsiaq.AG-mut oqarpoq.
Sapaammi Qaqortumi silagissorsuuvoq umiatsiallu arlallit uumasumik tassannga takorannersumik takuniaallutik alapernaaserput. Imaassinnaavorli aamma tamaani nannut suli arlaqartut.
- Kangerlummi suli ilorpasinnerusumik Taartumi nannumik takusoqarsimavoq. Kisianni Saqqaarsik aamma Taartoq imminnut ungasiarmata ilimanngilaq nannup ataasiinnaasimanissaa. Aamma Narsaq avaqqullugu nanoq naluttoq siumorneqarsimavoq. Taamaammat ilimanarpoq Qaqortup Narsallu eqqaanni nannut arlariissasut, Bent Ole Kleist.
Taaneqareersutut kujataani nannuttassat tamakkerneqareernikuupput. Taamaammat nannut arlaat inoqarfinnut qaninnguussagaluarpat politeeqarfik qaninneq attaveqarfigineqassaaq.