Qaqortumi mittarfissaq pilersaarusiorneqalerpoq
Peqqissutsimut attaveqarnermullu Naalakkersuisup Steen Lyngep ilumuunnginnerarpaa mittarfik piaaraluni kinguarsarlugu
Demokraatit tunuliaqutaralugit Inatsisartunut ilaasortaq Jens B. Frederiksen paragraf 37 naapertorlugu peqqissutsimut attaveqarnermullu Naalakkersuisumut Steen Lyngemut, Atassut, Qaqortumi mittarfiliornissaq pillugu apeqquteqarpoq.
Jens B. Frederiksenip peqqutigaa Naalakkersuisut suut misissuiffigeqqissimaarneraat.
Tamatumunnga Steen Lynge akivoq:
– Qaqortumi mittarfiliortoqassappat sanaartornermut pilersaarutinut Naalakkersuisut iliuuseqarnissamut pilersaarut akuersissutigisimavaat. Pilersaarut taanna malillugu Qaqortumi mittarfiliornikkut nunaqarfimmut Narsarsuarmut Kujataanilu innuttaasunut sunniuteqaatissat misissorneqassapput, kiisalu qeqertaasami Qaqortumi teknikkikkut misissueqqaartoqassalluni. Tamatuma saniatigut suliniummut niuernikkut pilersaarusiortoqassaaq, tassuuna suliniutip akilersinnaassusia misissorneqassalluni.
Misissuinerit amerlanerusut
Jens B. Frederiksenip apeqqutigaa sanaartornerup kinguaattuunnginnissaanut naalakkersuisoq qanoq iliuuseqarsimanersoq. Tamatumunnga Steen Lynge akivoq:
– Qaqortumi mittarfiliornissamut aningaasartuutissanut maannangaaq misissuisoqarnanilu naatsorsuisoqarsimanngilaq, teknikkikkullu pilersaarusiornermut tunngavik amigaataavoq. Teknikkimmut aningaasatigullu naatsorsuinerit tamakkua pingaaruteqarput Naalakkersuisut paasisanik tunngavilimmik aalajangiinissaannut, isumaqanngilangalu akisusaassuseqassasoq pisariaqartunik misissueqqaartinnata angisuumik akisuumillu mittarfiliorutta.