Qaqortoq

Qaqortumi mittarfiliortoqarnissaa Demokraatinit suli tapersersorneqarpoq, kisianni...

Namminersorlutik Oqartussat kisimi aningaasaliisoralugu Qaqortumi mittarfiliortoqarsinnaanngitsoq, Demokraatit siulittaasuata Anda Uldumip erseqqissaatigaa

Anda Uldum

Demokraatit siulittaasuata tulliata aamma Inatsisartuni qinigassanngortittup Randi Vestergaard Evaldsenip Radioavisimi apersorneqarneranut tunngasumik Demokraatit siulittaasuat Anda Uldum erseqqissaateqarpoq.

Qaqortumi mittarfittaarniarneq unitsiinnarneqassanngitsoq siunnersuutigaa.

- Demokraatini ilungersorluni Qaqortumi timmisartunut suluusalinnut mittarfiliornissamut aningaasaliissutissanik ujaaseqataassaagut. Ilungersorluta anguniassavarput nunat allamiut suliniummut aningaasaleeqataatinniarnissaat aamma ilungersorluta sulissutigissuarput mittarfiliornissaq arlaatigulluunniit akornusersorniarneqannginnissaa. Massakkuli aningaasarsiornikkut inissisimanerput pissutigalugu takorlooruminaakkallarpoq timmisartunut suluusalinnut mittarfiliornissaq, Namminersorlutik Oqartussat kisiisa aningaasaliisoralugit, Anda Uldum nassuiaavoq.

Aningaasanut inatsisissatut siunnersuut
Aningaasaqarnermut Naalakkersuisup Vittus Qujaukitsup Aningaasanut Inatsisissatut saqqummiunnikuusaani novemberimi akuerineqartussaagaluartumi, Qaqortumi timmisartunut suluusalinnut mittarfiliornissamut immikkoortitsisoqareernikuusoq.

- Tassunga tunngatillugu taamaallaat oqassaanga, aningaasanut inatsisissatut siunnersuut saqqummiunneqartoq taanna aningaasanut inatsisissani saqqummiunneqartarsimasunut allanut naleqqiullugu akisussaassuseqannginnerpaasimammat. . Aamma siunnersuut illuatungiliuttunit, Naalakkersuisut ilaannit, naalakkersuisooqataasimasunillu itigarterujussuarneqarpoq. Aningaasanut inatsisissamut siunnersuut allatut oqaatigalugu ima ajortigisimavoq allaat akuerineqanngisaannartussaasimalluni aamma piviusorsiunngilluinnaqqissaarpoq eqqarsassalluni Qaqortumi timmisartunut suluusalinnut mittarfissaq pisortat kisimik akilerumaaraat, Anda Uldum oqarpoq.

Powered by Labrador CMS