Qaqortumi mittarfik: Mittarfiliornissami misissuineq sakkortuumik isornartorsiorneqarpoq
Suliakkiissut inniminnigaq, aningaasaliinissamut qitiusut ilaatinneqaratik; tassalu mittarfik tassungalu aqqusineq. Taama pilersaarusiornermut ilisimatooq Ulrik Jørgensen Kommune Kujallermut KPMG-p inuiaqatigiit aningaasaqarnerannik misissuineranik atuarsimasoq oqarpoq
”Qaqortumi mittarfiliorneq akilersinnaavoq” – Kommune Kujallermit ungasinngitsukkut tusagassiuutinut nalunaarummi tamanna qulequtarineqarpoq. Qulequtarineqartoq inuiaqatigiit aningaasaqarnerannik misissuinermik Islandimi KPMG-mit kommunimut suliarineqartunik tunngaveqarpoq. Misissuinermi Qaqortumi mittarfiliorneq kommunip imminut napatinnissaanik anguniaqarnermi tunngaviliissasoq inerniliunneqarpoq, kiisalu Atlantikup avannaani mittarfimmik pilersitsineq annertuumik aningaasaqarnikkut sunniuteqassasoq ilaatigut kujataanut takornariat amerlillutik.
KPMG-p misissuinerani periarfissat pingasut kinguneri takutinneqarput – allanngortoqarani, Atlantikup avannaani mittarfimmik pilersitsineq, nunallu immikkoortuani mittarfimmik pilersitsineq. Mittarfiliassarli namminermini tassungalu aqqusineq inuiaqatigiit aningaasaqarnerannik misissuinermi ilaatinneqanngilaq, tamakkiisumik nunatta karsianit aningaasalerneqassasoq aallaavigineqarmat.
Aningaasaliinissat qiterisaat ilaatinneqassaaq
Taamatulli naatsorsuisoqarsinnaanngilaq, Aalborgip ilisimatusarfiani pilersaarusiornermut immikkoortortami ilisimatooq Ulrik Jørgenseni oqarpoq.
- Inuiaqatigiit aningaasaqarnerannik misissuinerunngivippoq aningaasaliiffigineqartussat qiterisaat ilaatinneqanngippat, ”tunissutitulli” naatsorsuutigineqarluni. Taamaalilluni misissuinermi miffigiuminartuuneq, mittarfimmik sillimmateqarnissaq, nunalerinerup ineriartornera takornariarpassuarnillu assersuutigalugu qallunaatsiaat illukuinik allanillu takuniaasut angallassinissaannik pisariaqartitsinermi apeqqutit pingaarutillit igisiniarneqarsimanngillat. Aamma isumaqarpunga periarfissat allat piviusuunngitsut, tassaallunili kommunimit KPMG-mut inniminnigaq allaat mittarfimmi ajornartorsiuteqarfiusumi 1.500 meteriusumi Atlantikup avannaani angallannerup namminermini pitsaanerusunik aningaasartaqartup takutinnissaa siunertaalluni, Ulrik Jørgensen oqarpoq, isumaqarluni misissuinermi ajornartorsiutit aaqqiissutissallu suunersut nassuiarneqarsimanngitsoq.
Allaaserisaq tamaat Sermitsiami atuaruk. Uani ataani linki aqqutigalugu aviisimut isissutissarsigit: