Great Greenland
Qaqortumi mersortarfimmi ingerlatat aallarteqqinneqarput
Inuussutissarsiornermut naalakkersuisup Vittus Qujaukitsup (S) Qaqortumi Great Greenlandip suliffissuani nittarsaasarfimmik (visitorcenter) pilersitsinissamik ingerlatsinissamillu Great Greenland sullissinissamik isumaqatigiissuteqarfigaa
Inuussutissarsiornermut, Sulisartoqarnermut, Niuernermut Nunanullu Allanut Tunngasunut Naalakkersuisup Vittus Qujaukitsup (S) Great Greenland sullissnissamik isumaqatigiissuteqarfigaa.
Namminersorlutik Oqartussat ataasinngormat ualikkut tusagassiorfinnut nalunaarutikkut taamatut paasissutissiipput.
Takornarianut puisit amiinik tunisassiat
Sullissinissamik isumaqatigiissummi pineqarput nittarsaasarfimmik pilersitsinissaq ingerlatsinissarlu, tassani qanga ullutsinnilu kalaallit puisinniartarnerat paasissutissiissutigineqassalluni, kiisalu sannavimmik puisit amiinik tunisassianik, takornarianut naatsorsuussanik, tunisassiortussamik ingerlatsinissaq.
– Puisit amiinik nittarsaanermi pingaarutilimmut ilaavoq oqaluttuarissallugu puisinniarneq aamma ullutsinni kalaallit kulturiannut pingaarutillip ilagigaa, neqaa nerisatta ilagigaa pingaarutilik, piniarneq nungusaataanngitsumik ingerlanneqartoq aammalu puisit amii kalaallit kulturiannut suli pingaarutilimmik inissisimasoq,Vittus Qujaukitsoq oqarpoq.
Sullissinissamik isumaqatigiissutip akilissavai
Great Greenlandip aningaasaqarnera artukkerumanagu sullissinissamik isumaqatigiissutip akilissavai, taassumalu nittarsaasarfik pilersissavaa, ilaatigut mersortarfiup ingerlataanik attassiinnartussaq takornariaqarnerup siuarsarneqarnerata ilaatut, Naalakkersuisut oqarput.
– Taamaasilluni mersortarfiup sammisai Great Greenlandip atisassiaanik sananermit takornarianut tunisassianik sananermut allanngortinneqassaaq, soorlu aaqqatinik, isersimmatinik tammajuitsussanillu mikinerusunik. Sumiiffinni amerlanerusuni nittarsaasarfinnik (visitorcenter) pilersitsisoqarnera ilutigalugu mersortarfik tamakkua tammajuitsussanik pisiniarfiinut pilersuisunngorsinnaavoq, Vittus Qujaukitsoq paasissutissiivoq.
Taamaasilluni siunertaavoq piffissap ingerlanerani sullissinissamik isumaqatigiissut nittarsaasarfinnik ataqatigiissaariffimmut, 2018-imi Isfjordscenterip ammarneqarneranut atatillugu pilersinneqartussamut, ingerlateqqinneqassasoq.
Natsernut ilassutitut aningaasaliissutit
Naalakkersuisut aamma Aningaasanut Ataatsimiititaliamit taperserneqarput natsiit amiinik suliarinninnerup nangeqqinneqarnissaanut ilassutitut aningaasaliissuteqarnissamut.
– Sullissinissamik isumaqatigiissutip maanna atuuttup iluani natsiit suliarineqartarnerisa nanginneqarnissaanut periarfissaqarsimanngilaq. Taamaattumik nuannaarutigeqaarput Naalakkersuisut Aningaasanut Inatsit suleqatigalugu natsiit amiisa suliarineqartarnerisa nanginneqarnissaanut ilassutitut aningaasaliissutissanik nassaarsimammata.
Taamatuttaaq Naalakkersuisut Aningaasanut Ataatsimiititaliaq 800.000 koruuninik aningaasaliissuteqarnissamik qinnuigisimavaa, Great Greenland aningaasaliissuteqarnermut aningaasartuutaanik oqilisaanniarlugu.