Ujakkaarluni GM
Qaqortumi GM-imik aaqqissuussisut angusat allattorsimaffii paatsiveqartinngilaat
Sisoraatinik oqilaniulluni GM-eqarneranut atatillugu klubbip aaqqissuussisup QSAP-p elektroniskimik piffissalersuut nutaaq ajornartorsiutigaa
Aatsaavissuaq siullermeersumik Qaqortumi klubbi QSAP sisoraatinik oqilaniulluni Nunatsinni pissartanngorniunnermik aaqqissuussisuuvoq.
Aaqqissuussisulli, peqataasullu, nuannarinnittullu tusagassiorfiillu pakatsissutigeqisaannik elektroniskimik piffissalersuut nutaaq annertuumik ajornartorsiortitsivoq. Tamanna pissutigalugu angusanut allattorsimaffiit kukkuneqartarput kingusissukkullu aatsaat tamanut saqqummiunneqartarlutik.
Flemming Enequist, Kalaallit Nunaanni Sisorartartut Kattuffianneersoq Sermitsiaq.AG-mut oqaluttuarpoq immikkut ilisimasalik Danmarkimeersoq, piffissalersuummik nutaamik ilisimannittoq, aatsaat tallimanngormat Qaqortumut pisimavoq, pissartanngorniunnerit sisamanngornermi aallartereeraluartut.
Silarlunnera pissutigalugu Kangerlussuarmi Narsarsuarmilu saperngusimavoq, pilersaarutigineqartutullu ataasinngornermi tikinngitsoorluni.
– Sapinngisarput tamaat pissutsit iluarsiniarsaraavut, Flemming Enequist oqarpoq, taannalu Sisorartartut Kattuffianni sisoraatinik oqilaniunnermut ataatsimiititaliami siulittaasuuvoq.
Sisoraatinik oqilaniuttartup Martin Møllerip, Nuummi NSP-meersup, GM imatut nalilerpaa:
- Aaqqissuussineq ingerlalluaraluarpoq. Angusanulli allattorsimaffiit ajornartorsiutaapput.
Sisoraatinik oqilaniulluni pissartanngorniunneq ataasinngorpat naggataarneqassaaq.