Qaqortoq
Qaqortumi atuarfik serlersaarfigineqarpoq
Angutit inuusuttut marluk pasineqarput Qaqortumi Tasersuup Atuarfiani serlersaarisimasutut
Qaqortumi politiit angutit inuusuttut marluk marlunngornermi ualikkut tigusaraat Tasersuup Atuarfiata nutaartaani annertuumik serlersaarisimasutut pasillugit.
Serlersaarineq marlunngornermi ullaaralaakkut pisimavoq. Sanasut atuarfiup nutaartassaannik iluarsaassisut suliartoramik avaanngunartumik takusaqarput.
Asaffiit, iikkat, igalaat, nateq atortullu aserorterneqarsimapput. Maanna aarleqqutigineqarpoq atuarfiup nutaartaata atulernissaata aasamut augustip aallaqqaataani pisussatut pilersaarutaasup kinguaattoornissaa.
Pasineqartut ilisimaneqareersut
Qaqortumi politiit marlunngornerup ingerlanerani inuit pasinarsinnaasut isikkuinik oqaluttuunneqarput.
- Inuit taakku isikkui inunnut ilisimariikkatsinnut sanilliullugit misissorpagut. Ualilluinnarneranilu angutit inuusuttut 18-it missaannik ukiullit marluk tigusaraagut. Aappaa serlersaarisimalluni nassuereerpoq aappaali pisuunnginnerarluni, Kujallermi politiini vicepolitikommissær Bent Ole Kleist Sermitsiaq.AG-mut oqaluttuarpoq.
Angutit inuusuttut suli politiinit tigummineqarput sulilu aalajangiiffigineqanngilaq Kujallermi Eqqartuussivimmut sassartinneqassanersut.
Politiit aamma Kommune Kujallermeersut suli misissorpaat serlersaarineq qanoq annertutigisimasoq.
Pingasunngornerup ingerlanerani serlersaariffiusumit assit Sermitsiaq.AG-mi takuneqarsinnaalerumaarput.