Qaqortoq
Qaqortumi angut toqutsisimasutut pasineqarpoq: Iliveq qaqinneqarpoq
Politiit toqutsisoqarsimaneranik pasitsaassaqarlutik ilivermik assaallutik qaqitsipput akunnerup naanerani. Qaqortumi politiit angut 20-t missaannik ukioqartoq toqutsisimasutut pasivaat
Angut 20-t missaannik ukioqartoq Qaqortumi politiinit tigummigallarneqarpoq sapaatit akunnerini sisamani. Angut politiinit toqutsisimasutut pasineqarpoq, vicepolitimesteri Morten Nielsen oqarpoq.
Politiit angummik toqutsisoqarneranik takunnissimasutut kalerrinneqarput, taannalu juulimi pisuusoq oqaatigineqarluni.
- Toqutsisimasutut pasineqartoq septembarip qulingiluaanni killisiorneqarpoq. Qaqortumi eqqartuussivimmit aalajangerneqarpoq angut sapaatit akunnerini sisamani politiinit paarigallarneqassasoq, Morten Nielsen Sermitsiaq.AGmut oqaluttuarpoq.
Toqusoqarsimatillugu misissuisartut Danmarkimit tikipput, ilivermik assaasoqarpoq, misissuisoqarlunilu toqusup timaani, Morten Nielsen nassuiaavoq.
Iliveq Qaqortup iliveqarfiata nutaanerusortaaniittoq assariarlugu qaqinneqarpoq. Angut toqukkut qimaguttoq juulip aallaqqaataani ilisaavoq.
- Toqungasup timaanik misissuineq eqqissisimasumik ataqqinnittumillu ingerlanneqarpoq, Morten Nielsen oqarpoq.
Misissuisartut misissuinertik pillugu sapaatit akunneri marluk qaangiuppata paasisaqarfigissavaat.