ingerlanerlunneq

Qaqortumi aalisakkanik tunisineq unittooqqavoq

Arctic Prime Fisheries Qaqortumi tunisassiorfimmini saarullinnik annerusumik tunisiffigineqanngilaq. KNR taama allaaserisaqarpoq.

Arctic Prime Fisheries fabrik

Arctic Prime Fisheriesip Qaqortumi tunisassiorfia uninngaannangajappoq. Siorna tassani inuit 60-it missaanniittut tunisassiorfimmi sulipput, ukiormannalu taamaallaat pingasuniit tallimat tungaannaannut amerlassuseqarlutik. KNR taama allappoq.

2016-imi qaammatini arfineq-pingasuni siullerni tunisineq 910 tonsininngaanniit ukiormanna 31 tonsinut appariaateqarpoq.

Arctic Prime Fisheries ajornartorsiutinit marlunnit eqqugaaqqavoq. Ukioq manna aalisarneq ingerlalluannginnerujussuuvoq aammalu kilisaataasa aappaat amutsivimmiilluni.

Arctic Prime Fisheriesip taamaammat Nanortalimmi tunisassiorfik kisiat ammatinniarlugu aalajangerpoq, ingerlatseqatigiiffiup pisortaa Malakias Andreassen KNR-imut oqarpoq.

Powered by Labrador CMS