Qaqortoq: Qaartitsilluni ajutoortoqarnerani inuit pingasut eqqorneqartut
Qaqortumi Niuernermik Ilinniarfimmi atuartut pingasut napparsimaviliaanneqartariaqarsimapput atuarfiup eqqaani qaartitsilluni ajutoortoqareersoq
Qaqortumi Niuernermik Ilinniarfiup eqqaani qaartitsilluni ajutoortoqarsimaneranik politiit nalunaarfigineqarput nalunaaqutaq 13.35 ullumi pingasunngornermi.
Niuernermi Ilinniarfimmi ilinniartut pingasut ajutoortoqarneranit eqqorneqarsimasut politeeqarfimmi politikommisæriugallartoq Henrik Bjørch Sermitsiaq.AG-mut oqarpoq.
- Atuartitsisoqarnerani qaartitsilluni ajutoortoqarpoq, tassani atuartut pingasut ujaqqanit igalaaminerniillu eqqorneqarput. Taakku annertunerusumik ajoqqusinngillat, kisianni pisoq tupassutigaat, aamma napparsimavimmit angerlareerput, Henrik Bjørch oqarpoq.
Qaartitsilluni ajutoortoqarnera politiinit misissorneqassasoq oqaatigaa.
- Sooq taamatut ajutoortoqarnersoq paasiniassavarput, taamaalisoqarneranilu inatsisinik aamma unioqqutitsisoqarsimanersoq misissorneqassaaq, Qaqortumi politiini politikommisæriugallartoq Henrik Bjørch oqarpoq.