Qaanaaq
Qaqortanik qilalugarniarnermut uppernarsaatit utertinneqarnissaat piumasarineqartoq
Pisanik amigartumik nalunaarsuisoqartarsimanera misissorneqarnerata nalaani qaqortanik qilalugarniartoqassanngilaq. Pisarineqarsimasut maannakkut misissorneqaleruttorput
Pisanik arlaleriarluni nalunaarsuisoqartannginneq pisassiissutinik sippuisoqarsinnaaneranik kinguneqarsinnaammat Aalisarnermut, Piniarnermut Nunalerinermullu Naalakkersuisoqarfiup Qaasuitsup Kommunia suleqatigalugu Qaanaap aqutsiveqarfiani qilalukkanik qaqortanik piniarneq unitsikkallarpaat.
Tusagassiutinut nalunaaruteqarput.
Qaanaami politiit qilalukkat qaqortat pisassat sinnerlugit pisarineqarsimanersut piffissami matumani misissuiffigileruttoraat Sermitsiaq.AG-mi allaaserineqartareerpoq. Tamanna pivoq qilalukkat qaqortat pisarnermit amerlanerujussuit Qaanaap illoqarfia septembarip naanerani oktobarillu aallartinnerani sanioqqutereeraallu.
Naalakkersuisoqarfiup Qaasuitsup Kommunia piumaffigaa qaqortanik piniarsinnaanermut akuersissutit tamaasa kommunimut utertinneqassasut misissuinerullu naammassineqareernissaata pisanillu nalunaarsuinerit tamaasa tiguneqareernissaasa tungaanut atorunnaarsinneqarallassallutik.
Nalunaarsuisarnissat
- Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu pisat, saniatigut pisat pisassallu sapinngisamik piaarnerpaamik pisanik immikkut nalunaartussaatitaanermi immersugassaq atorlugu nalunaarutigineqassapput, Naalakkersuisoqarfik nalunaarpoq.
Naalakkersuisoqarfimmit erseqqissaatigineqarpoq pisassiissutigineqartut kommunimit qularnaatsumik akisussaaffigineqartussaammata, pisassiissutigineqartut aamma sipporneqannginnissaat akisussaaffigineqarmat, tamakkerneqarpatalu piniarneq piaartumik unitsinneqassammat.
- Qaanaami ukiuni sisamani teknikikkut pisassiiffiusuni ukiut siulliit ingerlaneranni qilalukkanik qaqortanik sippuilluni pisaqartoqarsimaneq kingunerissavaa ukiuni kingulliusuni ikittuinnarnik pisassiissuteqartoqarnissaa. Nalunaarut atuuttoq naapertorlugu pisap nerisassartai atorneqarsinnaasullu allat tamarmik angerlaanneqarlutilluunniit qimatulineqassapput. Pilaffiusimasoq perlukuiarneqarsimassaaq, Aalisarnermut, Piniarnermut Nunalerinermullu Naalakkersuisoqarfik nalunaarpoq.
Naalakkersuisoqarfimmit piniartunut erseqqissaatigineqassaaq pisanik amigartumik nalunaarsuisarnerup kingunerisinnaammagu qilalukkanik qaqortanik qernertanillu siunissami pisassiisarnernut sunniuteqarsinnaammat.