aatsitassat
Qanittukkut uuliasiortoqassagunanngilaq
Norskit uuliasiortitseqatigiiffiata Statoilip Nunatsinni uuliasiulersinnaaneranut ukiut sisamat arfinillit suli ingerlagallassagunarput
Statoil, Nunatta imartaani arlalinni uuliasiornissamut akuersissummik peqartoq, nangaalerpoq Nunatta imartaani uuliasiornissamut. Uuliasiortitseqatigiiffiup taassuma uuliamik annertuumik allat nassaarnerat takoqqaarlugu Nunatsinni uuliasiorusunnerluni isummissamaartoq, Berlingske Business allaaserinnippoq.
Nunatta imartaani uuliasiorluni qillerinissamut ukiormanna pilersaartoqanngilaq. Uuliasiornissamut akuersissutit atornissaasa qinnutiginissaannut nalunaarfissaq kingusinnerpaaq februariuvoq uuliasiortitseqatigiiffiillu arlaannaalluunniit akuersissumminik atuiniarluni nalunaarsimanngilaq.
Maanna paasinarsivoq norskit pigisaat Statoil Nunatsinni uuliasiornissamik ukiuni tullerni ingerlatsilersaanngitsoq.
Ukiut suli arlallit
- Issittumi allami uuliamik gassimillu nassaartarnivut ingerlalluaqaat taamaattumik aningaasat nukiillu taakkununnga maanna atorpavut. Taamaattumik pisariaqartinngilarput Kalaallit Nunaanni suliniutit nukinngunnissaat. Assersuutigalugu Barentshavemi suliaqartilluta ukiorpassuit ingerlagallassapput Kalaallit Nunaanni uuliamik tunisassiulersinnaanissamut, Statoilip Nunatsinni Savalimmiunilu misissuinermut pisortaa Runí M. Hansen Berlingske Businessimut oqarpoq.
Kingullermik Nunatta imartaani uuliasiorluni qillerineq 2011-mi pivoq taamanikkut Scotlandimiut uuliasiortitseqatigiiffiat Cairn Energy arlaleriarluni qillerigaluarmat iluatsitsinanili.
Uuliarsiortitseqatigiiffiit nunanit tamalaaneersut avannaani tunullu avannaarsuani misileraalluni uuliasiornissamut akuersissummik peqarput. Statoilip allat nassaarnerat takoqqaarusuppaa nammineq misileraalertigani.
- Eqqoriarsinnaanngilara qaqugu misileraalluni qillerinerit aallartissinnaanersut. Nassaartoqassappat annertoorujussuarmik nassaartoqaqqunaqaaq tassami uuliasiorfiit inerisarnerat atornerallu akisoorujussuuvoq. Uuliamik nassaarneq naammanngilaq nassaarli annertoorujussuusariaqarpoq, Runí M. Hansen oqarpoq.