Exit
Qanigisamik pingaartitsisoqartoq Aleqap ilumuunnginnerarpaa
Aleqa Hammondip aappaata inooqataatalu Siumup siulittaasuata tulliata Karl Lyberthip siunnersortaaneratut atorfinitsinneqarnera qanigisamik pingaartitsinerunngilaq. Aleqap KNR radioaviisimi qanigisamik pingaartitsisoqartoq ilumuunnginnerarpaa
Naalakkersuisut siulittaasuata Aleqa Hammondip aappata inooqataatalu Tom Ostermannip Naalakkersuisunut ilaasortamut Karl Lyberthimut siunnersortitut atorfinitsinneqarnera assigiinngitsunit isornartorsiorneqarpoq. Ilaatigut parteeqataanit, tassa naalakkersuisut siulittaasorisimasaanit Hans Enoksenimit, taannalu tallimanngormat nalunaadrpoq partiimit anilluni siunissamilu illua'tungiliuttuussalluni.
Aamma atuaruk: Hans Enoksenip nutaamik partiiliornissani isumaliutigaa
Aamma atuaruk: Ostermannip atorfinitsitaanera isornartorsiorneqaqqippoq
Hans Enoksenip partiimit aninera pivoq eqqarsaatigilluareerlugu, saqqummiunneqarmallu Tom Ostermann, Naalakkersuisut siulittaasuata aapparisaa, Naalakkersuisunut ilaasortamut Karl Lyberthimut siunnersortitut atorfinitsinneqartoq naammaginnilerpoq.
Aleqa Hammondip tallimanngormat unnukkut KNR radioaviisimi ilumuunnginnerarpaa qanigisamik pingaartitsisoqartoq. Taanna radioaviisimut oqarpoq:
– Aappara (Tom Ostermann, aaqqiss.) allatulli pisinnaatitaaffeqarpoq, ilisimasaminik misilittakkaminillu nalilerneqassaaq. Pillarneqassanngilaq pissutigiinnarlugu inooqatigigaminga. Uanga atorfinitsinngilara aamma atorfimmut qinnuteqarnissaanik kajumissaarsimanngilara, Aleqa Hammond oqarpoq.
Oqarnera tallimanngormat radioaviisimit tusaaneqarsinnaavoq, taannalu KNR-p nittartagaaniippoq. Oqarnera pivoq radioaviisi minutsinik 9:43-nik ingerlareersoq.
Sermitsiaq.AG-p Aleqa Hammond oqaaseqartinniaraluarpaa kinguneqanngitsumik.