Alaska:
Qangatut inuuneq nuannarineqarlualeriartortoq
Qangatut inooriaaseq inuusaaserineqaleriartoqqilerpoq.
Qaanniorneq, issittumiinneq indiamiullu nerisassiaannik iganeq Alaskami pikkorissarfigineqarsinnaasut ilagaat.
Qangatut inooriaatsimut pikkorissarumallutik nalunaartartut amerliartuinnarmata atuarfinni arlaqartut inersimasunut pikkorissarfiusinnaanngorlugit aaqqissuussisoqarpoq. Alaska Dispatch News taama allaaserisaqarpoq.
Inooriaaseq nutaaliaq
Qangatut inooriaatsip nuannaartorineqalertarnera piffissami aalajangersimasumi pisartoq atuarfiit pikkorissaanissamik neqeroorfiusut ilaat Folkskills oqarpoq.
Atuaruk: Unioqqutitsilluni tuttunniartoqarpoq
- Suna tamarmi muteerninngoriartuinnavippoq siuaattalu ilinniutiginikuusaat atorunnaaraluttuinnarlutigu. Ilaasalu annaarusunnagit attatiinnarusuttarpaat, John Moriarty Folkskillsimeersoq aviisimut soqutiginninneq pillugu nassuiaateqarpoq.
Kulturertik ilinniarusuppaat
Qangatut inooriaatsip pisinnaasallu atuarfiit ilaasa pikkorissarfiunissaannut neqerooruteqarpoq Alaskap nunataani annanniarnermut pikkorissaaneq kulturillu ilinniartitsissutiginissaa neqeroorutigineqartut ilagaat.
Tamannalumi soqutigineqarluartoq imminullu pilersorsinnaanermik siunertaqartoq nammineersinnaanerlu siunertarineqartartoq atuarfiup oqaatigaa.