ajutoorneq
Qamuteralak inunnut arlalinnut apuisoq: Ataaseq ajoqusingaatsiarsimavoq
Qamuteralak sukkasuumik ingerlalluni inunnik arlalinnik apuivoq, takunnittoq Sermitsiaq.AG-mut oqaluttuarpoq. Inuk ataaseq aqqunartiteqqangaarami Københavnimut aallarunneqarluni suliariartorneqarpoq.
Takunnittup apersornerata kingorna allaaserisaq nutarterneqarpoq
Tallimanngornermi unnukkut nalunaaqutaq 20.00 missaani qamuteralaat sismaallutik Nuugaatsiamit Illorsuarnut tusarnaartitsiartorlutik ingerlasimallutik, Piitannguaq Møller nassuiaavoq.
Qamuteralaat marluk ilatik ingiaqatigisatik qimappallaaleramikkit utaqqiniarlugit unipput. Tamannalu aalajangerneq kinguneqapiluppoq.
Sukkasooq
Utaqqinerminni qamuteralak alla sukkasoorujussuarmik ingerlalluni takkuteriasaarluni aporpai.
Piitannguaq Mølleri nammineq ajoquserpiarani Sermitsiaq.AG-mut ilisimatitsivoq, kisianni qisuariapallannermini qamuteralammik aportippianngilaq.
Taassumali qatanngutaa allalu ataaseq taama iluatsitsitiginngillat.
Napparsimmaviliaanneqartut
Uummannap eqqaaani nunaqarfiit Nuugaatsiap aamma Illorsuit akornanni sikumi qamuteralaat eqqaanni utaqqillutik uninngatillutik qisuarianngitsoorput.
- Maanna qatanngutiga niuujaqqalluni Dronning Ingridip Napparsimmavissuaniippoq, Piitannguaq Møller nassuiaavoq.
Aporneqartup aamma suli ajornerusumik aqqunartitersimasoq Københavnimut suliaritikkiartorsimavoq.
Qamuteralannik apuisoq aalakoorsimasoq Piitannguaq Møller ilisimatitsivoq.
Suliaq misissorneqartoq
Politiit suliaq misissorpaat. Qaasuitsumi politiit pisortaat Johan Davidsen, paasissutissat nutaat pillugit oqaaseqartinnissaanut iluatsissinnaasimanngilarput. KNR naapertorlugu siullermik ilisimatitsissutigineqaraluarpoq, qamuteralaat marluk apornerat ajutoornermut pissutaasimasoq.