Qamusiortartut naapisimaarnerat nuannerluinnartoq

Qamusiortartut nunani avannarlerneersut arfininngormalli Sisimiuni naapisimaarput.

Naak oqaatsitsigut paatsoortoqartaraluartoq naapisimaarneq nuannerluinnarpoq.

Qiimanarluarpoq

- Misigisaq nuannivippoq. Sannavimmut iseraanni ulapputtut qiimanartumillu ataatsimoorneq misigisassaavoq, Pipaluk Løgstrup oqarasuaatikkut pissarsiarigatsinni oqarpoq.

Taassuma ukiuni marlunni Arctic Nomads piviusunngornissaa sulissutigisimavaa. Sapaatip akunnerlu kingulleq peqataasut Ruslandimi Tjuktokameersut, USA-mi Alaskameersut, Nunatsinneersullu tikilluaqusinnaanngorpai. Canadamit peqataasut ullumi aatsaat tikiupput.

- Ullut siulliit ulapaarfioqaat. Qamusiatillu piariissaneraat ernummatigilaarsimavara, oqaluttuarpoq.

Qamutit siulliit piareerput

Ullulli ingerlanerini qamusiortut malinnaaffiginerini piareeriartortut paasinarsimmata eqqissilluni aaqqissuussani malinnaaffingerujoorsinnaanngorpaa.

Atuaruk: Qimussit pillugit ataatsimeersuarnissaq kinguartinneqarpoq

- Angalaarujoorlunga eqqarsaatingerujoorpara aaqqissuussaq iluatsilluarmat nuannaarutigalugu, Pipaluk Løgstrup oqarpoq.

Qamusiortut qiimmisaarlutik ulappummata siulliit piareeraluttualerput. Tjuktokamiut, Qaanaarmiut, Iluliarmiut Sisimiormiullu naligiittorujussuupput.

- Pikkorittorujussuupput, peqataasinnaagamillu tunniusseqataalsinnaanertik tanngassimaarutigigaat malunnarpoq, Pipaluk Løgstrup oqaluttuarpoq.

Qillerut qanoq nipeqarpa?

Oqaloqatigiinniarnermi paatsooqatigiinnerit ussersornikkut qaangerneqarput.

- Qillerut atorniarneqaraangat qanoq nipiliortarnera ilaarlugu paasitinniarneqartarpoq, Pipalik Løgstrup oqaluttuarpoq. KTI-llu sannaviutiminnik atukkiinerat naliginnaanngitsumik ajunngitsuliornerusoq eqqaallugu.

Atuaruk: Nunanit tamalaaneersut Sisimiunut qamusioriartussasut

Ilisimasariillu aamma naapeqqinnissaannut piffissaqarfigineqarluni. Joelie Sanguya Canadameersoq tikimmat Qaerngaaq Nielsen Savissivimmiu ilisarisimagaa paasinarsivoq. Taakkua Canadami qimusseqatigiinnikuusimapput.

- Takorniortut isigalugit attortinnaqaaq.

Qamutit misilittarneqassapput

Sapaatiuppat nalunnguarfiup tasiani qamutit misilittarneqassapput. Tamannalu pitinnagu Taseralimmi qamusiortartut saqqummiillutillu paasititsiniaassapput.

Maannalu ingerlalluaraluartut aaqqissuisumut Pipaluk Løgstrupimut ullut ulapaarfiusussat suli aggerput.

- Ukiut 1.000 missaat qaangiuppata, aperiganni qaqugu sianeqqissinnaanersunga illalaarluni akivaanga.

Piffissamillu siusinnerusukkut oqaloqatigeeqqissinnaalluta isumaqatigiissutigaarput. Qamusiortut piariigaat qanoq inerneqarnersut Sermitsiaq.AG-p oqaluttuariniassammagit.