Tasiusaq

Qamittoornerup kingorna kiassarnermut atortut kommunip akilerniarai

Upernaviup eqqaani nunaqarfimmi sarfaaruttoornerup kingorna kiassarnermut atortunut akiligassat 35.000 koruunit Avannaata Kommuniata akilerniarpai. - Tamanna immikkut pisoqarmat taamaappoq, borgmesteri oqarpoq

Arkivfoto.

Qaammatini marlunni nunqarfimmi Tasiusami allanngorartumik sarfaqarniarneq ataasinngornermi januaarip 29-anni akunnerit arfinillit missaanni 32,2 gradinik issitsigisumi sarfaaruttoornermik kinguneqarpoq.

Avannaata Kommuniani upalungaarsimasut nunaqarfimmi Tasiusami Pilersuisup ammatinneqarneranik aalajangiisitsipput, kiassarnermullu atortunik agguaassisoqarpoq. Kiassarnerup atortut soorlu kissarsuutit petruuliumik ikummatillit, ikumasartut aamma naneruutit 35.000 koruuninik akeqartut, nunaqarfimmi illut amerlanersaat uuliatortumik kissarsuutillit sarfaaruttoornermi kiassarsarinnaanngimmata.

Aamma atuaruk: Nunaqarfik sarfaaruttoq: Kiassaatit 35.000 koruuninut nalillit agguaanneqarput

Allami pisoqartillugu pisoq nalilertarniaraat
Avannaata Kommuniani borgmesteri Palle Jerimiassen (S) naapertorlugu kommunip 35.000 koruunit akilerniarpai, kisianni innuttaasut allat sarfaaruttuussagaluarpata kiassarnermut atortunik agguaasoqartalerniarnersoq oqaatigerusunngilaa:

- Sarfaaruttoornermi kiassaatinut aningaasartuutit akilissavagut, Palle Jerimiassen Sermitsiaq.AG-mut oqarpoq.

- Avannaata Kommuniani innuttaasut allat issittumi sarfaaruttoorunik ilinnut sianerlutik kissarsuutinik agguarneqarsinnaasut paasisariaqarpa?

- Una pisoq immikkuullarissuuvoq, tassani 26-inik issippoq, illillu nammineq aamma Sermitsiaq.AG-mi allaaserisattut 30-nik issittutut misinnarsimavoq, Palle Jerimiassen oqarpoq.

- Innuttaaut allat sarfaaruttoorunik kissarsuutinik kommunimit pissarsisinnaanissartik naatsorsuutigissanngilaat?

- Pisut tamaasa nalilersortarumaarpagut, Palle Jerimiassen oqarpoq.

Sarfap aqqutaata ilaani atuivallaartoqarnerata Tasiusap innaallagissiorfiani transformatori aserortippaa, taamaalillunilu nunaqarfik sarfaarulluni, illut amerlanerit unnukkut 20.00-ip missaanit unnuakkut marlup missaata tungaanut kiassarunnaarlutik.

Powered by Labrador CMS